Erdoǵan Máskeý men Kıev arasyndaǵy tikeleı kelissózderge alań usyndy
ASTANA. KAZINFORM – Ankara Reseı men Ýkraına arasyndaǵy qaqtyǵysty beıbit jolmen retteýde sheshýshi ról atqarýǵa daıyn ekenin taǵy da málimdedi, dep habarlaıdy Kazinform agenttiginiń menshikti tilshisi.
Túrkııa prezıdenti Rejep Taıyp Erdoǵan Ýkraına prezıdenti Vladımır Zelenskıımen kezdesýinde taraptar arasyndaǵy dıalog arnalaryn ashyq ustaý nıetin qýattap, eki eldiń basshylary kelisse, olardy tikeleı kelissózder úshin qabyldaýǵa ázir ekenin jetkizdi.
Túrkııa prezıdenti janyndaǵy qoǵamdyq baılanystar dırektorattyń málimetinshe, Erdoǵan beıbitshiliktiń ornaýyn barynsha tezdetýdiń mańyzdylyǵyn atap ótip, dıalogqa tehnıkalyq deńgeıde de, memleket basshylary deńgeıinde de tolyq qoldaý bildirdi.
Ol qaqtyǵysty tek tikeleı kelissózder jáne ortaq qaǵıdalardy tabý arqyly sheshý qajettigin, bul adam shyǵynyn azaıtý úshin mańyzdy ekenin aıtty.
Osy dıplomatııalyq serpin aıasynda Ystanbulda kelissózder úderisin qaıta bastaý baǵytynda jumys jandandy.
Reseı delegatsııasynyń basshysy Vladımır Medınskııdiń aıtýynsha, Reseıdiń basty maqsaty – uzaqmerzimdi beıbitshilikke qol jetkizý jáne qaqtyǵystyń túpki sebepterin joıý. Ystanbuldaǵy kelissózder 2022 jyly úzilgen beıbit úderistiń jalǵasy retinde qarastyrylyp otyr.
Prezıdent Zelenskııdiń sózinshe, Ýkraına delegatsııasy – Qorǵanys mınıstri Rústem Ýmerovtiń jetekshiligimen Ystanbulda 16 mamyrǵa deıin qalyp, kelissózderdi jalǵastyrýǵa daıyn. Zelenskıı bul sheshim Erdoǵan men AQSh prezıdenti Donald Tramptyń kúsh-jigerine qurmet retinde qabyldanǵanyn jáne shıelenisti báseńdetýge baǵyttalǵan alǵashqy qadamdarǵa úmit artatynyn atap ótti.
Buǵan deıin jazǵanymyzdaı, Ystanbuldaǵy Reseı-Ýkraına kelissózi keıinge shegerildi.