Erdoǵan Qyrǵyzstanǵa memlekettik saparmen bardy

BІShKEK. KAZINFORM – Túrkııa Prezıdenti Rejep Taııp Erdoǵan 4 qarasha kúni memlekettik saparmen Bishkekke bardy. Ony «Manas» halyqaralyq áýejaıynda prezıdent Sadyr Japarov kútip aldy. Bul týraly memleket basshysynyń baspasóz qyzmeti habarlady, dep jazady 24.kg.

Mártebeli qonaqtardy qarsy alýda eki eldiń týy ilinip, kilem tóselip, ulttyq kıiz úı túrindegi ınstallıatsııa ornatylyp, qurmetti qaraýyl jasaqtaldy.

Rejep Taııyp Erdoǵandy qarsy alǵan ulttyq kıim kıgen boıjetkender oǵan gúl, baýyrsaq, bal syılady. Túrik basshysyn qyrǵyz eliniń qusbegileri aıryqsha qyzyqtyrǵandaı kórindi.

Prezıdentter men olardyń jubaılary qyrǵyz jáne túrik mýzykalyq týyndylaryn oryndaǵan qyrǵyz ónerpazdarynyń qatysýymen ótken kontserttik baǵdarlamany tamashalady.

– Sapar barysynda Qyrǵyz Respýblıkasy men Túrkııa basshylarynyń shaǵyn quramdaǵy kelissózderi, sondaı-aq olardyń tóraǵalyǵymen Strategııalyq yntymaqtastyq jónindegi Joǵarǵy keńestiń altynshy otyrysy ótedi, onda Qyrǵyzstannyń ózekti máselelerin talqylaý josparlanýda, – delingen habarda.

Sapar qorytyndysy boıynsha eki el arasyndaǵy strategııalyq yntymaqtastyqty keńeıtýge jáne memleketaralyq qatynastardy odan ári nyǵaıtýǵa baǵyttalǵan birqatar ekijaqty qujattarǵa qol qoıý josparlanýda.

Osyǵan deıin Erdoǵannyń resmı saparmen Qyrǵyzstanǵa baratyny týraly jazdyq.