Erdoǵan Ystanbulda Reseı men Ýkraına kelissózin qaıta bastaýǵa shaqyrdy
ASTANA. KAZINFORM — Ystanbuldaǵy kelissóz — Reseı men Ýkraına qaqtyǵysynyń tereńdep bara jatqan aýyr saldary aıasynda dıplomatııalyq kúsh-jigerdegi mańyzdy kezeń. Bul týraly Túrkııa prezıdenti Rejep Taııp Erdoǵan Ankarada ýkraınalyq áriptesi Vladımır Zelenskıımen birlesken baspasóz máslıhatynda málimdedi, dep habarlaıdy Anadoly.
— Ózekti máselelerdi sheshýde keshendi tásil negizinde Ystanbul protsesin qaıta bastaý paıdaly bolar edi, — dedi túrik kóshbasshysy.
Onyń aıtýynsha, Ankara qaqtyǵysty toqtatýǵa nıettengen barlyq seriktesterden Ystanbul protsesine syndarly tásil kútip otyr.
— Osy turǵyda biz odaqtasymyz — Amerıka Qurama Shtattarynyń osy protseske qatysýyn joǵary baǵalaımyz, — dep atap ótti túrik kóshbasshysy.
Túrkııa kóshbasshysy sondaı-aq túrik tarapynyń Reseımen atysty toqtatýdy jedeldetetin jáne ádil ári uzaq merzimdi beıbitshilikke jol ashatyn usynystardy talqylaýǵa daıyn ekenin bildirdi.
Memleket basshysy ýkraınalyq áriptesiniń saparyna óte qanaǵattanǵanyn atap ótti. Ol Prezıdent Vladımır Zelenskııdiń bıyl Túrkııaǵa eki ret sapar shekkenin, onyń barysynda taraptar ekijaqty qarym-qatynas jáne Ýkraınadaǵy qaqtyǵysty sheshý boıynsha pikir almasqanyn eske saldy.
— Ýkraına Prezıdentiniń sońǵy saparynan keıin, osy jyldyń mamyr aıynda biz Ýkraına men Reseı delegatsııalary arasynda úsh jyldan astam ýaqyt buryn bastalǵan tikeleı kelissózdiń kezekti raýndyn uıymdastyrdyq. Osy úsh raýnd barysynda eń aldymen gýmanıtarlyq máseleler boıynsha ilgerileýshilikke qol jetkizildi. Budan basqa, taraptar atysty toqtatý máselelerin tikeleı talqylaýǵa jáne beıbitshilik kelissózin ótkizýge, sondaı-aq áskerı máselelerdi tikeleı talqylaý múmkindigine ıe boldy. Biz munyń bárin qundy qadamdar retinde qarastyryp otyrmyz, — dedi túrik kóshbasshysy.
Kreml Erdoǵannyń Ystanbul protsesin jalǵastyrý týraly sózderine jaýap berdi. RF prezıdentiniń baspasóz hatshysy Dmıtrıı Peskov málimdegendeı, Reseı Ýkraına boıynsha kelissózdi jalǵastyrýǵa ashyq.
Kazinform úshin arnaıy Anadoly seriktes agenttigi usyndy.
Qazan aıynda AQSh prezıdenti Donald Tramp Ýkraına prezıdenti Vladımır Zelenskııdi Aq úıde qabyldaǵanyn jazǵan bolatynbyz.