Erdoǵan Irannan ushyrylǵan zymyrannyń joıylýyna qatysty pikir bildirdi
ASTANA.KAZINFORM - Túrkııa «NATO-daǵy odaqtastarymen tyǵyz úılestire otyryp, barlyq qajetti sharalardy qabyldap jatyr jáne qajet bolǵan jaǵdaıda dereý jaýap beredi».
Túrkııa prezıdenti Rejep Taıyp Erdoǵan Iran aýmaǵynan eldiń áýe keńistigine qaraı ballıstıkalyq zymyrannyń ushyrylýyna qatysty pikir bildirdi.
Ol aımaq úshin osy qıyn kezeńde Túrkııa eshqandaı jaǵdaıda óz shekarasy men áýe keńistiginiń qaýipsizdigin «kezdeısoq jaǵdaıǵa» qaldyrmaıtynyn málimdedi, dep habarlaıdy Anadolu.
-Túrkııa tarapy mundaı oqıǵalardyń qaıtalanýyna jol bermeý úshin «eń aýyr eskertý» jasady. Túrkııanyń el men onyń halqynyń qaýipsizdigin qamtamasyz etýge degen tabandylyǵy men qabileti joǵary deńgeıde», - dedi túrik kóshbasshysy.
Buǵan deıin Túrkııanyń Ulttyq qorǵanys mınıstrligi Iran aýmaǵynan ushyrylyp, eldiń áýe keńistigine qaraı baǵyttalǵan ballıstıkalyq zymyrannyń joıylǵany týraly habarlaǵan bolatyn.
Agenttik málimetinshe, snarıad Irak pen Sırııanyń áýe keńistiginen ótip, sodan keıin Shyǵys Jerorta teńizinde ornalasqan NATO áýe jáne zymyranǵa qarsy qorǵanys kúshteri ony dereý joıdy.
