Erdoǵan Dúısen Qaseıinovke Álisher Naýaı atyndaǵy halyqaralyq syılyqty tabystady
ASTANA. KAZINFORM — Mádenıet jáne aqparat mınıstrligi memleket jáne qoǵam qaıratkeri, dıplomat, kórnekti mýzykant ári professor Dúısen Qaseıinovti Álisher Naýaı atyndaǵy «Túrki áleminiń birligine qosqan úlesi úshin» halyqaralyq syılyqpen marapattalýymen quttyqtady.
Marapattaý týraly sheshim Túrki memleketteri uıymynyń Syrtqy ister mınıstrleri keńesi otyrysynyń qorytyndysy boıynsha qabyldandy. Saltanatty rásim 2026 jylǵy 29 qazanda Ankarada ótken TMU-nyń 13-sammıti aıasynda ótti. Joǵary marapatty Túrkııa Respýblıkasynyń Prezıdenti Rejep Taııp Erdoǵan tabystady.
Bul marapat Dúısen Qaseıinovtiń túrki elderiniń mádenı baılanysyn nyǵaıtyp, áriptestigin keńeıtý jolyndaǵy kópjyldyq eńbegine berilgen joǵary baǵa boldy.
Qazaqstannyń eńbek sińirgen óner qaıratkeri, burynǵy Mádenıet mınıstri Dúısen Qaseıinov 2008-2022 jyldary Halyqaralyq túrki mádenıeti uıymy – TÚRKSOI-ǵa basshylyq etti. Osy jyldary ol túrki halyqtarynyń mádenı murasyn keńinen tanytýǵa, shyǵarmashylyq bastamalardy qoldaýǵa jáne Qazaqstan mádenıetin halyqaralyq deńgeıde nasıhattaýǵa eleýli úles qosty.
Mádenıet jáne aqparat mınıstrligi Dúısen Qaseıinovtiń ortaq murany saqtaý jáne túrki memleketteri arasyndaǵy gýmanıtarlyq baılanysty nyǵaıtý jolyndaǵy eńbegin eskere otyryp, onyń kandıdatýrasyn osy syılyqqa usyndy.
Álisher Naýaı atyndaǵy halyqaralyq syılyq 2021 jyly Ózbekstan Prezıdentiniń bastamasymen taǵaıyndalǵan. Alǵash ret 2022 jyly qyrǵyz jazýshysy Shyńǵys Aıtmatov ómirden ótkennen keıin atalǵan syılyqpen marapattaldy. 2025 jyly túrik ǵalymy, Nobel syılyǵynyń laýreaty Ázız Sanjar syılyq ıegeri atandy.
- Qazaqstan Respýblıkasynyń Mádenıet jáne aqparat mınıstrligi Dúısen Qaseıinovke zor densaýlyq, baq-bereke jáne otandyq mádenıetti órkendetý men túrki áleminiń mádenı birligin nyǵaıtý jolyndaǵy aldaǵy qyzmetine shyǵarmashylyq tabys tileıdi, - delingen mınıstrlik habarlamasynda.
Dúısen Qaseıinov dástúrli mýzyka jáne bı halyqaralyq uıymynyń elshisi atanǵanyn jazǵan edik.
