Erdoǵan Dinı ister basqarmasyna jańa basshy taǵaıyndady
YSTANBUL. KAZINFORM — Túrkııanyń Dinı ister basqarmasyn (Diyanet) Ystanbul múftıi Safı Arpaǵash basqaratyn boldy, dep habarlaıdy Kazinform agenttiginiń menshikti tilshisi.
Túrkııada eldiń dinı ahýalyn qadaǵalaıtyn basty memlekettik qurylymdardyń biri – Dinı ister basqarmasynyń (Diyanet) jańa tóraǵasy taǵaıyndaldy. Prezıdent Rejep Taıyp Erdoǵan bul laýazymǵa buryn Stambul múftıi qyzmetin atqarǵan professor Safı Arpaǵyshty bekitti.
Professor Arpaǵysh – dinı jáne qoǵamdyq ortada keńinen tanylǵan tulǵa. Ol 2023 jyly Túrkııa Respýblıkasynyń negizin qalaýshy Mustafa Kemal Atatúriktiń qaıtys bolǵan kúnine oraı ótken duǵa rásimine qatysyp, qoǵam nazaryn aýdarǵan bolatyn. Bul shara zaıyrly respýblıkalyq mura men qazirgi dinı qurylymdar arasyndaǵy tatý kelisimniń belgisi retinde qabyldandy.
Arpaǵyshtyń taǵaıyndalýyn jergilikti sarapshylar Túrkııanyń dinı saıasaty úshin betburys sát bolýy múmkin dep baǵalaýda. Endi Diyanet basshysy retinde Safı Arpaǵysh dinı senim, dinı bilim berý, musylman qaýymdastyqtarymen halyqaralyq baılanys jáne eldegi ımamdardyń qyzmetin retteý sııaqty máselelerde memlekettik baǵytty qalyptastyrýda mańyzdy ról atqarady.
Kútilip otyrǵandaı, onyń basshylyǵymen basqarma dástúrli ıslam qundylyqtary men Túrkııanyń memlekettik baǵyty arasyndaǵy úılesimdi arttyrýǵa basymdyq berýi múmkin. Sondaı-aq, basqarma sheteldegi dinı ókildikteri men qorlary arqyly syrtqy qyzmetin jalǵastyrady.
Arpaǵyshtyń bul taǵaıyndalýy el ishindegi ıdeologııalyq kún tártibine de áser etýi yqtımal, ásirese saılaý aldyndaǵy kezeń men zaıyrly jáne dinı baǵytty jaqtaýshylar arasyndaǵy jalǵasyp jatqan pikirtalas aıasynda.
Buǵan deıin biz Erdoǵannyń Túrkııa Qarýly kúshteriniń joǵary basshylyǵynda aýqymdy kadrlyq aýys-túıister jasaǵanyn habarlaǵanbyz. Belgili bolǵandaı, Túrkııa prezıdenti endi joǵary áskerı qolbasshylardyń qyzmet etý merzimin 72 jasqa deıin uzartýǵa quzyrly.
Buǵan deıin habarlanǵandaı, Túrkııa 2028 jylǵa qaraı ekonomıkalyq ósim men ınflıatsııa tómendeıtinin boljap otyr.