Erdoǵan: Biz qaqtyǵysty, kóz jasy men qantógisti kórgimiz kelmeıdi
ASTANA. KAZINFORM – Túrik kóshbasshysy Túrkııanyń táýelsiz ónerkásipshileri men kásipkerleri qaýymdastyǵynyń (MÜSIAD) dırektorlar keńesiniń múshelerimen kezdesýinde Túrkııa men Izraıl arasyndaǵy saýda kólemi 9,5 mıllıard dollarǵa jetkenin atap ótti. Biraq osyǵan qaramastan el «bul esikti tolyǵymen jaýyp tastaǵan».
Rejep Taıyp Erdoǵan Izraılmen saýdany toqtatý máselesine qatysty Túrkııa tek Izraıldi aqylǵa salyp, Palestınadaǵy atysty tolyq toqtatýǵa qol jetkizýge tyrysatynyn aıtty. Onyń aıtýynsha, Túrkııanyń bul máselede bir ǵana maqsaty bar – shekten shyǵyp ketken Bınıamın Netanıahý ákimshiligin Palestınadaǵy atysty toqtatýǵa májbúrleý. Bul rette túrik basshysy Túrkııa úkimetiniń Izraıldi soǵysty toqtatýǵa jáne Palestınaǵa gýmanıtarlyq kómek kólemin arttyrýǵa májbúrleý úshin birqatar kommertsııalyq shara qabyldaǵanyn basa aıtty.
«Túrkııa Gaza sektoryna gýmanıtarlyq kómek jóneltýde álemde birinshi orynda tur. Búgingi tańda Palestına halqyna 50 myń tonnaǵa jýyq júk jóneltildi. Biz óz aımaǵymyzdaǵy birde-bir elmen jaýlasýǵa nemese soǵysýǵa umtylmaımyz. Biz jaı ǵana geografııamyzda qaqtyǵystardy, qan men kóz jasyn kórgimiz kelmeıdi», - deıdi Rejep Taıyp Erdoǵan.
Buǵan deıin Túrkııanyń Saýda mınıstrligi Izraılmen saýda-ekonomıkalyq qarym-qatynasyn toqtatqanyn habarlaǵan bolatyn. Vedomstvo memlekettik deńgeıde qolǵa alynǵan sharalardyń ekinshi kezeńin júzege asyrý bastalǵanyn habarlady. Qazirgi ýaqytta barlyq taýar boıynsha Izraılge eksport-ımport operatsııalary toqtatyldy.
