Erdoǵan BUU minberinen álem elderin Palestınany moıyndaýǵa shaqyrdy
ASTANA. KAZINFORM – Túrkııa prezıdenti Rejep Taııp Erdoǵan Palestına memleketin áli moıyndamaǵan elderdi óz sheshimin qaıta qaraýǵa shaqyrdy. Bul týraly ol BUU Bas Assambleıasynyń 81-sessııasynda sóılegen sózinde málimdedi, dep habarlaıdy Anadolý agenttigi.
– Búginde Palestına memleketin áli moıyndamaǵan barlyq elderdi óz sheshimin qaıta qaraýǵa shaqyramyn, – dedi Túrkııa basshysy.
Erdoǵan Palestına prezıdenti Mahmud Abbastyń BUU otyrysyna qatysa almaǵanyna qaramastan, Túrkııa buǵan deıingi jyldaǵydaı Palestınanyń erkindigi men egemendigin qorǵaýdy jalǵastyratynyn aıtty. Ol 1967 jylǵy shekara negizinde, astanasy Shyǵys Ierýsalım bolatyn Palestına memleketi qurylatyn kúndi asyǵa kútetinin jetkizdi.
Túrkııa prezıdenti Gaza sektoryndaǵy jaǵdaıǵa da toqtaldy. Onyń aıtýynsha, Gaza balalar eń kóp qaza tapqan ári ampýtatsııadan ótken balalar sany boıynsha álemdegi eń joǵary kórsetkish tirkelgen aımaqqa aınalǵan. Erdoǵan halyqaralyq qaýymdastyqty ondaǵy jaǵdaıǵa beıjaı qaramaýǵa shaqyrdy.
Ol Batys jaǵalaýda qonystanýshylardyń zorlyq-zombylyǵy kúsheıgenin, al Ierýsalımde musylmandar men hrıstıandardyń qasıetti oryndarǵa kirýine kedergi keltirilip jatqanyn aıtty.
Erdoǵan sonymen birge qazirgi halyqaralyq qatynastar júıesin reformalaý qajet ekenin málimdedi. Ol BUU Qaýipsizdik Keńesin reformalap, sheshim qabyldaýda «Besten kóp álem» qaǵıdatyn basshylyqqa alýǵa shaqyrdy. Túrkııa basshysynyń aıtýynsha, álemdegi 190-nan astam eldiń taǵdyry bes memlekettiń sheshimine táýeldi bolmaýy tıis.
Túrkııa prezıdenti halyqaralyq quqyqtyń kúshti jáne álsiz memleketterge ártúrli qoldanylmaýy kerektigin aıtyp, Palestına, Lıvan jáne Sýdanda BUU-dan kómek kútken adamdardyń kóńili qalǵanyn jetkizdi.
Erdoǵan sondaı-aq Sırııadaǵy jaǵdaıǵa, Reseı men Ýkraına arasyndaǵy qaqtyǵysqa, Lıvııa men Kıpr máselelerine toqtaldy. Ol Ormýz buǵazynda keme qatynasynyń erkindigin qamtamasyz etýge shaqyrdy.
Buǵan qosa Túrkııa basshysy Eýropanyń qaýipsizdigine qatysty Ankaranyń rólin atap ótip, Túrkııany Eýropanyń qaýipsizdik arhıtektýrasynan tys qaldyrý onyń kúsheıýine múmkindik bermeıtinin aıtty.
Eske sala ketsek, buǵan deıin BUU Bas Assambleıasy 81-sessııasynyń ashylýyna Qazaqstan delegatsııasy da qatysyp jatqanyn jazdyq.
Sessııanyń ashylýynda sóz sóılegen Tramp BUU minberinen Irandy «joıyp jiberemin» dep kezekti márte málimdedi.
