Erdoǵan 21 naýryzdy resmı túrde kóktem men baýyrlastyq merekesi dep jarııalaýdy usyndy
ASTANA. KAZINFORM – Naýryz meıramyna arnalǵan is-sharada sóz sóılegen Túrkııa prezıdenti Rejep Taıyp Erdoǵan 21 naýryzdy «kóktem men baýyrlastyq merekesi» etip jarııalaýdy usynyp, bul bastamany parlamentke engizý bastamasyn kóterdi, dep habarlaıdy Kazinform agenttiginiń menshikti tilshisi.
Atalǵan málimdeme Naýryzdy merekeleý aıasynda jasaldy. Erdoǵannyń sózinshe, bul kóktemniń, túrki áleminiń birligi men baýyrlastyǵynyń sımvoly bolmaq.
Túrkııada Naýryzǵa degen kózqaras burynnan óte kúrdeli jáne qarama-qaıshylyqqa toly. El turǵyndarynyń kópshiligi kóktemniń bul merekesi týraly kóp bile bermeıdi. Naýryz mańyzdy oqıǵa sanalatyn Qazaqstan, Ózbekstan men Ázerbaıjanǵa qaraǵanda, túrkııalyqtar bul kúndi moıyndamaıdy jáne bul máselede kóptegen qıyndyqtar bar.
Bul kún kúrd birligi men saıası kúrestiń sımvoly ispettes. 1980 jylǵy tóńkeristen keıin bılik ókilderi Naýryzdy separatızmniń sımvoly retinde qabyldap, oǵan tyıym salýǵa tyrysty. Sodan beri mereke tek kóktemgi jańarý kúni ǵana emes, narazylyq sharasy retinde de qabyldandy. Óz kezeginde ol memlekettiń Naýryzǵa asa saqtyqpen qaraýyna sebep boldy.
Keıingi kezde Túrkııadaǵy saıası klımat ózgere bastady. «Kúrdistannyń jumysshy partııasynyń» kóshbasshysy Adbýlla Odjalannyń qarýly kúresti toqtatyp, kúrdter turatyn aýdandarda beıbitshilikke umtylýǵa shaqyrýy Naýryzǵa degen kózqarsty ózgertýge negiz boldy.
Túrkııalyq jýrnalıst Mýrat Ietkınniń pikirinshe, Naýryzdy resmı mereke dep moıyndaý eldegi birlikti nyǵaıtýdaǵy mańyzdy qadam bolar edi.
Ol sondaı-aq bul kún kúrdter turatyn óńirlerde ǵana emes, Ortalyq Azııa men Iranda, Aýǵanstanda da atalyp ótetinin jáne ol mádenıet pen tarıhty jalǵaıtyn shara ekenin atap ótti.
Ietkınniń pikirinshe, Naýryzǵa kúrd separatızminiń nyshany retinde qaraý qate jáne saıası turǵydan negizsiz. Túptep kelgende Naýryz túrik jáne parsylardy qosa alǵanda kóptegen halyqtar arasynda myńdaǵan jyldardan beri toılanyp kele jatqan mereke.
Bul – saıası kúrestiń emes, tabıǵattyń túrlenýi men jańarýynyń, yntymaqtyń merekesi.
Jýrnalıst sonymen qatar Naýryzdyń Túrkııanyń resmı kúntizbesine enýi eldegi túrli etnıkalyq jáne mádenı toptardyń tatý-tátti qarym-qatynasyn qalyptastyrýdaǵy mańyzdy qadam bolatynyn jetkizdi.
Osyǵan deıin Ystanbul gýbernatorlyǵynyń ákimshiligi Ekrem Imamoglý ustalǵannan keıin narazylyq aktsııalaryna engizilgen tórt kúndik tyıymnyń solshyl kúrdterdiń «Teńdik pen demokratııa» partııasy uıymdastyratyn Naýryzǵa arnalǵan sherýge áser etpeıtinin jarııalaǵan bolatyn.
Keshe óziniń sóılegen sózinde Erdoǵan bul meıramdy mádenıetpen qatar túrik memleketteri arasyndaǵy baılanystardy nyǵaıtatyn mańyzdy element retinde de atap ótti.
Ol Naýryzdyń barlyq túrik memleketteri úshin birlik kúnine aınalyp, túrli salalar boıynsha yntymaqtastyqty nyǵaıtýǵa septigin tıgizetinin atap ótti.
- Men 21 naýryzdy kóktem men baýyrlastyq merekesi retinde jarııalaý týraly usynysty parlamentke engizýge daıynmyn, - dep málimdedi ol.
Túrkııa prezıdenti bul kúndi Túrik memleketteri uıymyna múshe elderdiń barlyǵy úshin ortaq etýdi usynyp, ony birlesip atap ótýdiń ózara qarym-qatynastardy odan saıyn tereńdetý úshin mańyzdy ekenin atady.
- Menińshe, Naýryz merekesin Túrik memleketteri uıymy aıasynda birlesip atap ótetin ýaqyt jetti. Mamyr aıynda, Majarstanda ótetin sammıt barysynda biz bul merekeni túrik álemi úshin ortaq kún retinde atap ótýdi usynamyz, -dedi Erdoǵan.
Onyń sózinshe, túrik ıntegratsııasy men baýyrlas elderdiń bir-birine jaqyn bola túsýiniń arqasynda Naýryz Túrkııada tanymal bola bastady.
Osyǵan deıin Kúrdistan jumysshy partııasy Túrkııa úkimetimen bitimge keletinin jarııalaǵany týraly jazdyq.