Erdoǵan 12 sáýirde Antalııa áýejaıynyń jańa termınaldaryn ashady

ASTANA. KAZINFORM — 12 sáýirde jańa ishki jáne halyqaralyq termınaldar ashylǵannan keıin Antalıa áýejaıynyń termınal aýmaǵy men onyń jolaýshy ótkizý qabileti eki ese artady, dep habarlaıdy TASS.

Bul týraly Túrkııanyń kólik mınıstri Abdýlkadır Ýraloǵlý málimdedi. Sondaı-aq ol termınaldardyń ashylý saltanatyna prezıdent Rejep Taıyp Erdoǵan qatysatynyn habarlady.

— Prezıdent Taıyp Erdoǵan 12 sáýirde Antalııa áýejaıynyń jańa termınal ǵımarattaryn ashady. Biz halyqaralyq termınal aýmaǵyn 90,1 myń sharshy metrden 224 myń sharshy metrge deıin ulǵaıtamyz. Іshki termınal 36,8 myń sharshy metrden 75 myńǵa deıin keńeıedi. Osylaısha, Antalııa áýejaıynyń jyldyq ótkizý qabileti 82 mıllıon jolaýshyǵa deıin artady. Qazirgi ýaqytta áýejaı ortasha eseppen 35 mln jolaýshyny qabyldaıdy, — delingen mınıstrdiń vedomstvo saıtyndaǵy málimdemesinde.

Ushaqtardyń turaq aımaqtarynyń sany 108-den 176-ǵa deıin ulǵaıady. Áýejaıdaǵy VIP-termınal 690 sharshy metrden 2 myńǵa deıin keńeıtildi. Sondaı-aq áýe aılaǵynyń aýmaǵynda aýdany 2 myń sharshy metr úkimettik qonaqúı ashylady. Budan bólek áýejaıdaǵy ártúrli qyzmetterdiń aýmaǵy men úı-jaılary edáýir keńeıtiledi.

Ýraloǵlý 2024 jyly Antalııa áýejaıy 39,2 mıllıon jolaýshyǵa qyzmet kórsetkenin habarlady.

— 2024 jyldyń sońyndaǵy jaǵdaı boıynsha biz ishki jelilerde 45 351 ushaq pen 6,2 mıllıon jolaýshyǵa, sonymen qatar halyqaralyq jelilerde 188,7 myń ushaq pen 32,9 mıllıon jolaýshyǵa qyzmet kórsettik, — dep qosty mınıstr.

Jazda Antalııa áýejaıy Túrkııada Ystambuldan keıin ekinshi jolaýshy eń kóp júretin kólik habtarynyń biri sanalady. Jaz maýsymynda ushaqtar orta eseppen bes mınýt saıyn ushyp ketedi nemese qonyp jatady. Áýe aılaǵynda úsh ushý-qoný jolaǵy bar, olardyń ekeýi belsendi túrde qoldanylady.

Buǵan deıin Túrkııada ınflıatsııa áli de eki tańbaly deńgeıde saqtalyp otyrǵanyn jazǵan edik.