Erdenaevtyń qorǵaýshysy «Azııa kredıt bank» AQ múlkine tyıym salýdy surady
ALMATY. QazAqparat - «BJZQ» AQ burynǵy basshylarynyń isi boıynsha qorǵaýshy «Azııa kredıt bank» AQ-nyń 5,6 mlrd teńgege baǵalanatyn múlkine tyıym salýdy surady, dep habarlaıdy QazAqparat tilshisi.
Onyń aıtýynsha, bank basshylyǵy zańǵa qaıshy áreketterge jol bergen.
«Azııa Kredıt bank» nesıe saıasatyn óreskel buza otyryp, 2016 jyldyń 14 qazanynda 5 mlrd teńge kólemindegi «BJZQ» AQ aktıvin qabyldaǵan. 24 qarashadan bastap bul bank merziminen asyp ketti degen jeleýmen kepildegi 5 mlrd teńgeden aqsha aldy. Sol ýaqyttan beri bank BJZQ 5 mlrd teńgesin zańǵa qaıshy paıdalanyp keledi. Sondyqtan bank qorǵa 582 mln 191 myń teńge tóleýi tıis. Osyǵan oraı «Azııa kredıt bank» AQ-ǵa qatysty jeke qaýly jazyp, qalalyq prokýratýraǵa baǵyttaýdy jón kórdik. Sonymen qatar BJZQ aldyndaǵy mindetin ótemegeni úshin banktiń 5 mlrd 582 myń kólemindegi aktıvine tyıym salýdy talap etemiz», - dedi sottalýshy Rýslan Erdenaev.
Erdenaevtyń qorǵaýshylary da bul ótinishti qoldady.
«Qaıta qarjylandyrý bolǵan ýaqytta 10 paıyz mólsherleme bolǵan. Osy jerde bank aıyrma somasyn qorǵa tóleýi tıis», - dedi advokat Harıp Seıdova.
Sýdıa bul ótinishti otyrys sońyna taman qaraýdy uıǵardy.
Aıta keteıik, 9 qańtarda BJZQ basshylary qamaýǵa alyndy: BJZQ basqarma tóraǵasy Rýslan Erdenaev, «BJZQ» AQ táýekelderdi basqarý departamentiniń qarjylyq táýekelder basqarmasynyń basshysy Musa Bahtov, «Alataý Munaı Altyn» AQ baqylaý keńesiniń tóraǵasy Baqytjan Kenjebaev jáne «Býzgýl Aýrým» JShS dırektory Azat Naızaǵarın. Olarǵa QR QK-iniń 189-baby, 4-tarmaǵy, 2-bóligi (Senip tapsyrylǵan bóten múlikti ıemdenip alý nemese talan-tarajǵa salý) boıynsha aıyp taǵyldy. Atalǵan ispen ulttyq qaýipsizdik komıteti aınalysty.
