Erdáýlet Meırambekuly el chempıony atandy - sheteldegi qazaq baspasózi
«KAZINFORM» HAA sheteldegi qazaq tilinde taraıtyn aqparat kózderine aptalyq sholýyn usynady.
«Meniń Altaıym» telehıkaıasy Shyńjańnyń saıahatyn jandandyrdy - «Halyq gazeti»
Jaqynda 8 serııaly «Meniń Altaıym» telehıkaıasy Qytaıdyń Ortalyq telearnasynyń CCTV-1 arnasynda praım-taımda kórsetilip, qaralym boıynsha reıtıng kezeńinde birinshi orynǵa shyqty. Bul týraly osy aptada qytaılyq «Halyq gazeti» basylymy habarlaıdy.
Atalǵan BAQ-tyń dereginshe, «Meniń Altaıym» 2010 jyly tanymal jazýshy Lı Tszýan basyp shyǵarǵan attas esseler jınaǵynan beıimdelgen. Telehıkaıa Altaıda shaǵyn dúken ashqan Lı Vensıý men onyń otbasynyń jergilikti qazaq malshylarymen baılanysy, qarym-qatynasy baıandalady.
Bul mınıserııal Shyńjańnyń Altaı aımaǵynda túsirilgen jáne ondaǵy kórkem peızajdar týyndynyń biregeı belgisine aınalǵan.
«Kınodaǵy kórkem tabıǵat kórinisteri, baı jáne qaıtalanbas halyq mádenıeti, qarapaıym jáne muqııat ómir fılosofııasy kóptegen kórermendi qyzyqtyrdy, sonymen qatar jeli qoldanýshylarynyń nazaryn Altaıǵa aýdardy», - dep jazady qytaılyq BAQ.
Sondaı-aq osy aptada «Halyq gazeti» basylymynda «Qazaqstandyq qoımadan 1000 tonnadan astam jemdik bıdaı uny Qytaıǵa 15 kúnde jetti» degen taqyryptaǵy aqparat jarııalandy.
Keltirilgen derekterge súıensek, 10 mamyrda Qytaıdyń Lýchjoý portynyń Halyqaralyq konteınerlik termınalyna 62 konteıner júk tıelgen Qytaı-EO poıyzy kelgen.
Bul poıyz Qazaqstannyń Qostanaı qalasynan attanyp, Shyńjańnyń Qorǵas shekarasynan elge kirý arqyly Lýchjoýǵa keldi. Sapar barysy 15 kúnge sozylǵan. Júk salmaǵy 1612 tonna jemdik bıdaı uny. Kelesi qadamda júk Lýchjoý mańyndaǵy jem óńdeý zaýyttaryna jiberilmek eken.
Ózbekstanda 10 jańa halyqaralyq avtobýs baǵyty ashylady - «ÓzA»
2024 jyly Ózbekstanda 10 jańa halyqaralyq avtobýs baǵytyn ashý josparlanýda. Kólik mınıstrliginiń habarlaýynsha, búginde ulttyq jáne sheteldik 32 tasymaldaýshymen Ózbekstannan 37 baǵyt boıynsha Reseı, Qazaqstan, Qyrǵyzstan jáne Tájikstanǵa jalpy 196 avtobýs qatynaýy jolǵa qoıylǵan. Bul týraly «ÓzA» aqparat agenttigi habarlady.
Atap aıtqanda, kelesi 10 jańa halyqaralyq avtobýs baǵytynda bolmaq, Samarqand – Bishkek, Buhara – Bishkek, Buhara – Astana, Samarqand – Túrkistan,
Buhara – Túrkistan, Shahrısabz – Túrkistan, Samarqand – Dýshanbe, Buhara – Dýshanbe, Tashkent – Ýfa, Tashkent – Krasnodar.
«2024 jyldyń qańtar-sáýir aılarynda halyqaralyq avtobýs baǵyttarynda 173 myń jolaýshy tasymaldandy. Kórsetkishter 2023 jyldyń sáıkes kezeńimen salystyrǵanda 15 paıyzǵa ósken», - dep jazdy ózbekstandyq BAQ.
Qandasymyz Erdáýlet Meırambekuly el chempıony atandy - Harajorga
9 bólimnen jáne 160-tan astam oıynnan turatyn 6 kúndik tartysty básekeden keıin Gýandýn ólkesiniń Shenchjen qalasyndaǵy Lonhýa mádenı-sporttyq ortalyq sport zalynda 2024 jylǵy ulttyq boks chempıonaty mamyrdyń 14-i kúni keshke sátti aıaqtaldy.
Shyńjańnyń bokstan erler quramasy 2024 jylǵy bokstan erler arasyndaǵy Qytaıdyń ulttyq chempıonatynda 1 altyn, 2 kúmis jáne 1 qola medal jeńip alyp, bıylǵy el chempıonatynyń serııasyn sátti aıaqtady, dep habarlaıdy qytaılyq «Harajorga» basylymy.
Atalǵan BAQ-tyń dereginshe, shyńjańdyq boks sheberi Erdáýlet Meırambekuly fınalda 71 keli salmaq dárejesinde Hýbeılik Lıý Veıdi, Shensılik Lıý ıÝhaody jáne ıÝnnan ólkesinen kelgen Lı Gýofendi jeńip, 71 keli salmaq boıynsha chempıon ataǵyn jeńip aldy.
Jas oıynshylar da óte jaqsy óner kórsetken. 19 jastaǵy Mustafa Muhtar fınalda Chjetszıannan, ıÝnnannan jáne Beıjińnen kelgen qarsylastaryn art-artynan oısyrata jeńip, ulttyq chempıonatta 67 keli salmaqta ekinshi oryndy ıelengen.
Sonymen qatar, 92+ keli salmaqtaǵylardan Abdýrshıt Ramýlla kúmis medal enshilese, Izhar bir qola medaldi qanaǵat tutqan.
Aıta keteıik, 80 keli salmaqta tanymal boksshy Toqtarbek Tańatqanuly qatarly memlekettik komandadaǵy sportshylar Parıj Olımııada sport jarysyna daıyndalǵandyǵy sebepti osy jolǵy jarysqa qatyspady.
Sonymen qatar osy aptada «CNR» basylymynda «Ol Parıj Olımpıadasyna qatysý tolymdylyǵyna ıe boldy» degen taqyryptaǵy aqparat jarııalandy.
Naqytaraq aıtsaq, Ystanbul qalasynda ótken kúres túrlerinen Parıj olımpıadasyna álemdik irikteý týrnırinde Qytaıda turatyn qandasymyz Kabıran Abýshaımanuly Parıj olımpıadasynyń joldamasyn jeńip aldy.
Qandasymyz Abýshaımanuly Ystanbuldaǵy álemdik irikteýde shırek fınaldan súrinbeı ótip, jartylaı fınalda qarsylasyna jol berdi. Alaıda, qola medal úshin talasta qarsylasyn aıqyn basymdyqpen utyp, úzdikter qataryna kirdi. Al Olımpıada joldamasy sarapqa salynǵan sheshýshi synda ózbekstandyq qarsylasyn 2:1 esebimen utyp, Parıj Olımpıadasyna joldamany jeńip aldy.
Aıta keteıik, 26 jastaǵy Kabıran Abýshaımanuly Qytaıdaǵy qazaqtar kóp qonystanǵan Tarbaǵataı aımaǵy Dórbljin aýdanynda qazaq otbasynda dúnıege kelgen.
Ol osyǵan deıin Jazǵy Azııa oıyndarynda qola medal jeńip alsa, Azııa chempıonatynda kúmis júldege qol jetkizgen. Endi Túrkııadaǵy sońǵy álemdik irikteý týrnırinde Parıj olımpıadasynyń joldamasyn qanjyǵasyna baılady.
Sınhýa agenttiginiń habarlaýynsha, Qytaı quramasy kúres túrlerinen jalpy 11 joldama jeńip alǵan.
Iran, Ózbekstan jáne Qazaqstan tennıs federatsııalary arasyndaǵy yntymaqtastyq týraly memorandýmǵa qol qoıyldy -«Parstoday»
Iran tennıs federatsııasy basshysynyń Qazaqstanǵa saparynyń qorytyndysy boıynsha Iran, Qazaqstan jáne Ózbekstan tennıs federatsııalary arasyndaǵy yntymaqtastyq týraly eki memorandýmǵa jeke-jeke qol qoıyldy.
Bul týraly apta sońynda Irannyń «Parstoday» aqparat agenttigi habarlady.
Irandyq aqparat agenttiginiń málimetinshe, Azııalyq tennısti damytý jónindegi keńesshiler otyrysyna qatysý úshin Qazaqstanǵa barǵan Iran Islam Respýblıkasy tennıs federatsııasynyń prezıdenti Azızı Qazaqstan jáne Ózbekstan tennıs federatsııalarynyń basshylarymen bólek otyrystarda kezdesip, yntymaqtastyq týraly memorandýmǵa qol qoıdy.
«Talantty izdeýge nazar aýdarý, álemdik jáne jasóspirimder jarystarynda qoıylmaly belgilerdi shyǵarý, jarys kúntizbesi men úsh eldiń sportshylarynyń bir-biriniń jarystaryna qatysý múmkindigin túzetý, tóreshilik, jattyqtyrýshylar jáne bilim berý baǵdarlamalaryn almasý jáne ártúrli baǵdarlamalardy júzege asyrý, tennıstiń damýyna basa nazar aýdarý osy memorandýmdarda eskerilgen nárselerdiń qatarynda», - dep jazady ırandyq basylym.
Qazaqstanǵa kelgen sheteldik týrısterdiń sany artty - TRT
2023 jyly Qazaqstanǵa kelgen sheteldik týrısterdiń sany ótken jylmen salystyrǵanda eki ese ósip, 9,2 mıllıonǵa jetti.
Bul týraly osy aptada Túrkııa Radıo Televızııa portaly QR Týrızm jáne sport mınıstri Ermek Marjyqpaevtyń málimdemesine silteme jasap dep habarlady.
Aıta keteıik, QR Týrızm jáne sport mınıstri Ermek Marjyqpaev mınıstrler keńesiniń otyrysynda eldegi týrızm salasynyń damýy týraly málimdeme jasaǵan bolatyn.
Marjyqpaev 2023 jylǵy málimetter boıynsha týrızm salasynyń Kovıd-19 epıdemııasynan keıin tez qalpyna kelgenin aıtyp, 2023 jyly Qazaqstanǵa 9,2 mıllıon sheteldik keldi. Bul san 2022 jylmen salystyrǵanda eki ese kóp, degen.
Marjyqpaevtyń aıtýynsha, elde ishki týrıst sanynyń aıtarlyqtaı ósken. Atap aıtqanda, ótken jyly 9,6 mıllıonnan astam otandyq týrıst saıahatqa shyqqan.
Sondaı-aq osy aptada «TRT»-da «Túrkııa Májilisiniń basshysy men Qazaqstan elshisi kezdesti» degen taqyryptaǵy aqparat jaryq kórgen bolatyn.
Atalǵan BAQ-tyń málimetinshe, Túrkııa Uly Ulttyq Májilisiniń Tóraǵasy Nýman Kýrtýlmýsh Qazaqstannyń Túrkııadaǵy Elshisi Erkebulan Sápıevti qabyldady. Qabyldaýda Kýrtýlmýsh dos jáne baýyrlas eki el arasynda ár salada jaqsy qarym-qatynastyń bar ekenin jáne sońǵy kezdegi ózara saparlardyń bul qarym-qatynastarǵa úlken úles qosqanyn bildirdi.
Sondaı-aq jaqynda parlamenttik delegatsııamen birge Qazaqstanǵa resmı saparmen baratynyn aıtqan Kýrtýlmýsh Qazaqstannyń túrki álemi úshin mańyzdylyǵyna toqtalǵan.
Aıta keteıik, Túrkııa Uly Ulttyq Májilisiniń tóraǵasy Kýrtýlmýsh 2023 jyly 6 aqpanda Kahramanmarashta bolǵan jer silkinisterine baılanysty Túrkııaǵa kómek kórsetken Qazaqstanǵa alǵys aıtqan.
