Erbosynuly men Jańabaev álemniń eks-chempıonynyń boks keshinde aıqasady

NUR-SULTAN. QazAqparat – Qazaqstandyq eki boksshy WBA jáne IBF nusqalary boıynsha birinshi aýyr dıvızıondaǵy álemniń eks-chempıony, reseılik Denıs Lebedevtiń (34-2, 23KO) aıqasynyń anderkartynda jekpe-jek ótkizedi, dep habarlaıdy QazAqparat.

VKontakte áleýmettik jelisindegi «Qazaqstannyń kásipqoı boksy» paraqshasyndaǵy aqparatqa sáıkes, sýper orta salmaqta óner kórsetetin Aıdos Erbosynuly (12-0, 8KO) men jartylaı orta salmaqtaǵy Nursultan Jańabaevtyń (8-0, 5KO) qarsylastary ázirge belgisiz. Qos boksshy da Almaty mańynda ornalasqan AIBA-nyń Boks akademııasynda jattyǵýǵa kirisip ketti.

«27 jastaǵy A.Erbosynuly 12 aıqasta 12 ret jeńiske jetken (8-i – nokaýtpen). Onyń enshisinde WBA Inter-Continental jáne WBO Global tıtýldary, sondaı-aq 2018 jyldyń jeltoqsanynda Máskeýde belgııalyq Ilııas Achergıdi (12-4-1, 6KO) nokaýtqa túsirgennen keıin qol jetkizgen WBC Asia beldigi bar. Al 26 jastaǵy N.Jańabaev WBA Inter-Continental, WBO Oriental jáne IBF Pan Pacific beldikterine ıe. Ol rıngke 8 ret shyǵyp, barlyǵynda jeńiske jetken (beseýi – nokaýtpen)», - delingen aqparatta.

Boks keshi 21 jeltoqsan kúni Reseıdiń Krasnoıarsk qalasynda ótedi. Onyń basty aıqasynda Lebedevtiń qarsylasy Ońtústik Afrıka ókili Tabıso Mchýný (21-5, 13KO) bolmaq.

Aıta keteıik, Lebedevke WBA jáne IBF nusqalary boıynsha birinshi aýyr salmaqtaǵy tıtýldar tıesili bolyp kelgen.

⠀