Erbolat Janabylov isi Qarjylyq monıtorıng agenttigine áli túsken joq

ASTANA. KAZINFORM — Qarjylyq monıtorıng agenttigi tóraǵasynyń orynbasary Jeńis Elemesov 11 avtokólikti utysqa salǵan blogerler Erbolat Janabylov pen Elmıra Tólegenovanyń isine qatysty pikir bildirdi.

Agenttik ókili E. Janabylovqa qatysty sot sheshimi 15 qyrkúıekte shyǵarylǵanyn, sheshim berilgen kúnnen bastap 10 táýlik ishinde zańdy kúshine enetinin aıtty.

— Qazirgi ýaqytta bizdiń vedomstvoǵa materıaldar túsken joq. Alaıda olar túskennen keıin olarmen tanysyp shyǵý qajet. Eger onda qylmystyq jaýapkershilikke jatatyn is-áreket belgileri bolsa, tıisti is tirkelip, tergeý júrgiziledi. Tergeý barysynda quqyqtyq baǵa berip, saralaımyz, — dedi J. Elemesov Májiliste ótken brıfıngte.

Sonymen birge, Just King atymen tanymal bloger qazirdiń ózinde jaýapqa tartylyp, aıyppul salyndy. Onyń utys oıyndarynan kiris alǵan-almaǵany jáne salyq tólengen-tólenbegeni tekseriledi. Eger kiris 10 myń AEK-ten (shamamen 39 mln teńge) assa — zańsyz kásipkerlik boıynsha qylmystyq is qozǵalady. Eger tómen bolsa, ákimshilik jaýapkershilik qarastyrylady.
Eske sala ketsek, Erbolat Janabylov pen Elmıra Tólegenovanyń áreketin Týrızm jáne sport mınıstrligi nazaryna alǵan bolatyn. Blogerler Instagram jelisinde 11 avtokólikti oınatatynyn habarlaǵan edi.

15 qyrkúıekte is materıaldary qylmystyq quqyqbuzýshylyq belgileriniń bolýyna baılanysty Ekonomıkalyq tergep-tekserý departamentine joldandy.