Erbolat Muhamedjan Prezıdent TRK dırektorynyń keńesshisi bolyp taǵaıyndaldy

ASTANA. KAZINFORM — Jýrnalıst, birneshe telejoba avtory Erbolat Muhamedjan Qazaqstan Respýblıkasy Prezıdenti Teleradıokesheni dırektorynyń keńesshisi qyzmetine taǵaıyndaldy. Bul týraly QR Prezıdentiniń TRK baspasóz qyzmeti málim etti.

Erbolat Muhamedjan – memlekettik «Daryn» jastar syılyǵynyń laýreaty, «Qurmet» ordeniniń ıegeri, belgili telejýrnalıst jáne prodıýser.

Ár jyldary respýblıkalyq telearnalarda qyzmet etip, analıtıkalyq baǵdarlamalardyń avtory boldy. Medıa salasynda oqý jobalaryn júzege asyrdy.

Bilim berý jáne memlekettik basqarý salasynda tájirıbesi bar: Maqsut Narikbayev University-de basshylyq qyzmetter atqarǵan, sondaı-aq Bilim jáne ǵylym mınıstrligi júıesinde jumys istegen.

Gonkong pen Londondaǵy Bloomberg TV arnasynda kásibı taǵylymdamadan ótken, Eýropalyq Odaqtyń Brıýsseldegi baǵdarlamalaryna jáne Ońtústik Koreıada World Journalists Forum-ǵa qatysqan.

Qazirgi tańda medıa jobalardy jasaqtaýmen jáne júzege asyrýmen aınalysady, sonymen qatar «Ýáde» telejobasynyń avtory.

Eske sala keteıik, buǵan deıin Ilıa Skýb Halyqty áleýmettik qorǵaý salasyndaǵy retteý komıtetiniń tóraǵasy bolyp taǵaıyndalǵanyn jazǵan edik.