Erbolat Dosaev Ulttyq banktiń altyn-valıýta rezervi kólemin atady

NUR-SULTAN. QazAqparat - Qazaqstannyń halyqaralyq rezervi 89 mlrd dollardan asyp jyǵyldy. Bul týraly búgin Úkimet otyrysynda QR Ulttyq banki tóraǵasy Erbolat Dosaev aıtty, dep habarlaıdy QazAqparat tilshisi.

«Ulttyq banktiń altyn-valıýta rezervteri 1 qarashada aldyn ala derekter boıynsha 29,5 mlrd dollar boldy. Sáýirden bastap altyn-valıýta aktıvteriniń ósýi baıqalady. Qazanda olardyń kólemi 2,4 paıyzǵa nemese 704,9 mln dollarǵa ulǵaıdy», - dedi Erbolat Dosaev.

Onyń atap ótýinshe, buǵan klıentterdiń Ulttyq banktegi shottarda shetel valıýtasyndaǵy qaldyqtardyń ulǵaıýy, altyn satyp alý operatsııalary jáne oǵan álemdik baǵa belgileniminiń ósýi yqpal etti.

«Ulttyq qordyń shetel valıýtasyndaǵy aktıvteri qazanda aldyn ala derekter boıynsha 0,9 paıyzǵa 59,9 mlrd dollarǵa deıin ulǵaıdy. Eldiń halyqaralyq rezervteri qazan sońynda 89,4 mlrd dollardy qurady», - dedi UB tóraǵasy.