Erbolat Dosaev saılaýǵa jubaıymen birge keldi

ALMATY. QazAqparat- Alǵashqylardyń biri bolyp tańǵy saǵat 7-de №48 mektep-lıtseıinde ornalasqan №388 saılaý ýchaskesine Almaty ákimi Erbolat Dosaev jubaıymen birge keldi, dep habarlaıdy QazAqparat tilshisi.

«Búgin ótip jatqan saılaý Qazaqstan ómirindegi mańyzdy oqıǵa. Bul Memleket basshysy byltyr naýryz aıynda jarııalaǵan saıası reformalardyń sońǵy kezeńin bildiredi. Qala Májilis pen maslıhattyń saılanǵan depýtattary aldynda jańa mindetter týyndaıdy jáne olardyń jumysy Qazaqstannyń turaqty áleýmettik-ekonomıkalyq damýyn qamtamasyz etý jáne azamattarymyzdyń ómir súrý deńgeıin arttyrý jónindegi bastamalardy qoldaýǵa baǵyttalýy tıis. Qazaqstan men bizdiń súıikti Almatynyń taǵdyryna shyn júrekten alańdaıtyn almatylyqtar beı-jaı qaramaıtynyna jáne jáne jarqyn bolashaqqa daýys beretinine senimdimin», - dedi Erbolat Dosaev.

Buǵan deıin habarlaǵanymyzdaı, Astana ýaqytymen tańǵy saǵat 4-te Seýlde №258 jáne Tokıoda №261 saılaý ýchaskeleri álemde birinshi bolyp ashyldy.

Ońtústik Koreıadaǵy QR azamaty kýrsant Asanov Elnýr birinshi bolyp daýys berdi.

QR Konstıtýtsııasyna sáıkes, Parlament Májilisi aralas saılaý júıesi boıynsha Konstıtýtsııalyq zańda belgilengen tártippen saılanatyn 98 depýtattan turady. Biryńǵaı jalpyulttyq saılaý okrýgi aýmaǵy boıynsha, ıaǵnı partııalyq tizim boıynsha Májilistiń 69 depýtaty, bir mandatty aýmaqtyq saılaý okrýgteri boıynsha – 29 depýtat saılanady.