Erbolat Dosaev «Samuryq-Qazyna» dırektorlar keńesinen shyǵaryldy

ASTANA. KAZINFORM – Burynǵy Prezıdent Ákimshiligi basshysynyń orynbasary Erbolat Dosaev «Samuryq-Qazyna» ulttyq ál-aýqat qory dırektorlar keńesiniń quramynan shyǵaryldy. Bul týraly Qarjylyq eseptilik depozıtarııiniń saıtynda jarııalanǵan málimetke sáıkes belgili boldy.

Qujatqa sáıkes, qordyń basqarý organynyń quramyn ózgertý týraly sheshimdi 2026 jylǵy 25 naýryzda jalǵyz aktsıoner qabyldady.

Osyǵan baılanysty Erbolat Dosaev dırektorlar keńesiniń quramynan shyǵaryldy.

Qazirgi ýaqytta qordyń dırektorlar keńesiniń quramyna alty adam kiredi. Olar: Oljas Bektenov, Bolat Jámishev, Lýka Sýtera, Vong Hen Faın, Nurlan Jaqypov jáne Muhammed Jámıl ál Ramahı.

Eske sala keteıik, Erbolat Dosaev 2025 jyldyń jeltoqsanynda atalǵan qordyń dırektorlar keńesiniń múshesi bolyp taǵaıyndalǵan edi.

25 naýryzda Memleket basshysy Qasym-Jomart Toqaev Erbolat Dosaevty Prezıdent Ákimshiligi basshysynyń orynbasary qyzmetinen bosatty. Bul laýazymǵa ol 2025 jylǵy 19 qyrkúıekte taǵaıyndalǵan bolatyn.

Buǵan deıin ol 2022 jylǵy qańtardan bastap Almaty qalasynyń ákimi qyzmetin atqardy. 2019–2022 jyldary Qazaqstan Ulttyq bankiniń tóraǵasy boldy. Al 2017–2019 jyldary Premer-Mınıstrdiń orynbasary qyzmetin atqardy.

Sondaı-aq ár jyldary ulttyq ekonomıka mınıstri (2014–2016), Ekonomıka jáne bıýdjettik josparlaý mınıstri (2013–2014), Ekonomıkalyq damý jáne saýda mınıstri (2012–2013), Densaýlyq saqtaý mınıstri (2004–2006), Qarjy mınıstri (2003–2004) qyzmetterin atqardy.

2016–2017 jyldary «Báıterek» ulttyq basqarýshy holdıngin basqardy. Sonymen qatar 2001–2002 jyldary Tabıǵı monopolııalardy retteý jáne básekelestikti qorǵaý agenttiginiń tóraǵasy boldy.