Erbolat Dosaev kásipkerlerdi densaýlyq nysandaryn jekeshelendirýge qatysýǵa shaqyrdy
Aıta keteıik, Astanada "Qazaqstan Respýblıkasyndaǵy densaýlyq saqtaý salasyna ınvestıtsııalar" taqyrybynda alǵashqy halyqaralyq forým ótip jatyr. Onda densaýlyq saqtaý salasyna ınvestıtsııa tartý, memleket pen jekemenshik medıtsınanyń yntymaqtastyq úlgilerin izdestirý jáne memlekettik-jekeshelik áriptestik jobalaryn júzege asyrý máseleleri talqylanýda.
"El ekonomıkasyna memlekettiń qatysýyn EYDU elderiniń deńgeıine deıin azaıtý maqsatynda Memleket basshysy Úkimetke jekeshelendirýdi jedeldetip, 2018 jyldyń sońyna deıin aıaqtaýdy tapsyrdy. Bul densaýlyq saqtaý júıesine de qatysty. Jekeshelendirý formasy jańa menshik ıelerine memleket ıeligindegi aktıvterdi satýdan bastap, memlekettik-jekeshelik áriptestik, senimgerlik basqarý jáne basqa da túrli kooperatsııa formalaryn engizýge deıin ártúrli bolmaq. Osy múmkindikti paıdalana otyryp, jeke sektor ókilderin bul protseske belsene qatysýǵa shaqyramyn", - dedi vıtse-premer.
Úkimet basshysynyń orynbasary Qazaqstanda memlekettik-jekeshelik áriptestik pen otandyq jáne sheteldik ınvestorlarǵa jańa múmkindikter syılaıtyn ınvestıtsııalar týraly jańa zańnamanyń qabyldanǵanyn atap ótti. Sondaı-aq, ınvestıtsııalar men ınnovatsııalarǵa qoldaý kórsetetin damyǵan ınstıtýttar bar.
E.Dosaevtyń aıtýynsha, búginde densaýlyq saqtaý salasyn áleýmettik sala dep qana emes, ekonomıkanyń mańyzdy bólimi dep qaraǵan jón. Máselen, 2020 jylǵa qaraı áleýmettik salaǵa arnalǵan memlekettik bıýdjet shyǵyndary 47,4 paıyzǵa jetedi, onyń basym bóligi densaýlyq saqtaý salasyna tıesili.
2018 jyldyń 1 qańtarynan bastap, Mindetti áleýmettik medıtsınalyq saqtandyrý qory tegin medıtsınalyq kómektiń kepildendirilgen kólemimen jumys isteıtin biregeı operator retinde óz qyzmetin bastaıdy. 2020 jyldan bastap, Qorǵa jınalǵan qarajatqa baılanysty densaýlyq saqtaýdy qarjylandyrý qurylymynda eleýli ózgerister oryn alady.
Qazirgi ýaqytta Densaýlyq saqtaý mınıstrligine tegin medıtsınalyq kómektiń kepildendirilgen kólemi aıasynda qyzmet kórsetý úshin jeke medıtsınalyq uıymdardan kóptegen ótinimder kelip túsken. Sáıkesinshe, Úkimet respýblıkanyń densaýlyq saqtaý júıesin ınvestıtsııalaǵysy kelgenderge qolaıly jaǵdaı jasamaq.
Sonymen birge, Erbolat Dosaev sapaly qyzmet kórsetý aıasynda densaýlyq saqtaý júıesin jańǵyrtý ǵana emes, densaýlyq saqtaý ınfraqurylymyn jańǵyrtý men tsıfrlyq transformatsııalaýdyń da mańyzdy ekenin jetkizdi.
