Erbolat Dosaev qarjy sektoryndaǵy úsh jahandyq syn-qaterdi atady
NUR-SULTAN. QazAqparat – QR Ulttyq bankiniń tóraǵasy Erbolat Dosaev Qazaqstan qarjygerleriniń IX kongresinde qarjy sektoryndaǵy úsh jahandyq syn-qater týraly aıtyp berdi, dep habarlaıdy QazAqparat.
«Búkil álemdik ekonomıka sııaqty Qazaqstan ekonomıkasy da sońǵy 2 jylda koronavırýs pandemııasyna baılanysty ǵasyr daǵdarysyn bastan ótkerip otyr. Mundaı jaǵdaıda qarjy sektory úsh jahandyq syn-qaterge qarsy kelip tur. Birinshi syn-qater – ınflıatsııanyń jappaı ósýi jáne álemdik taýar naryqtaryndaǵy suranys pen usynystyń teńgerimsizdigi jáne taýar jetkizý isiniń toqtap qalýynan ınflıatsııalyq qysymnyń kóterilýi», - dedi Erbolat Dosaev.
Onyń aıtýynsha, álemdik ekonomıka qarqyndy túrde qalpyna kelip jatyr jáne vaktsınalaý arqasynda bıylǵy 3-toqsanda pandemııaǵa deıingi deńgeıge qaıta oraldy. Álemdik naqty JІÓ 2021 jyly 40 jyldan astam ýaqyt ishinde eń jyldam ósedi jáne Halyqaralyq valıýta qorynyń boljamdary boıynsha 5,9%-ti quraıdy dep kútilýde.
«Álemdik ekonomıka qalpyna keltirilgen soń shekteýli usynys kezindegi suranystyń tez ósýi kóptegen jyldar boıy shıkizattyń, kólik shyǵystarynyń rekordtyq ósýine jáne sonyń nátıjesinde álemdegi ınflıatsııalyq qysymnyń joǵarylaýyna alyp keledi. Jańa perspektıvalar men keń múmkindikter ashatyn ekinshi syn-qater – pandemııa áserinen búkil álemdik ekonomıkany jedel tsıfrlandyrý. Transformatsııalyq protsester utqyrlyq, yńǵaılylyq jáne qaýipsizdik talaptaryna jaýap beretin qarjylyq qyzmetterdi usynýdyń jańa formattaryn birinshi orynǵa shyǵardy», - dedi Ulttyq bank tóraǵasy.
Al kún tártibinde turǵan úshinshi syn-qater – klımattyq ózgeristerge qarsy kúres. Memleket basshysynyń ózi bul máselege kóp kóńil bóledi. Ol jasyl ekonomıkaǵa belsendi túrde kóshýdiń jáne qarjy sektory úshin ornyqty damý qaǵıdattaryn engizýdiń mańyzdylyǵyn atap ótken.
«Bolashaqta bizdi klımattyq jaǵdaılarǵa tikeleı áser etýden bólek jaýapty ınvestıtsııalaý qaǵıdattary eskerilgen qarjylyq landshafttyń ózgerýi kútip tur. Jahandyq syn-qaterler men qazirgi protsesterdi eskere otyryp, Ulttyq Bank bıylǵy naýryzda aqsha-kredıt saıasatynyń 2030 jylǵa deıingi strategııasyn bekitti, ol aqsha-kredıt saıasatyn júrgizýdiń ınstıtýtsıonaldyq jáne operatsııalyq negizin kúsheıtý, qarjy sektoryn monetarlyq saıasattyń tıimdi deldaly retinde damytý jáne makroekonomıkalyq saıasattyń kontrtsıkldylyǵyn arttyra otyryp, ekonomıkany odan ári ártaraptandyrý sııaqty úsh negizgi baǵyttan turady», - dedi E. Dosaev.
