Erbolat Dosaev «Halyq qatysatyn bıýdjet» aıasynda jaıaý júrginshiler kópirin jóndeý barysymen tanysty
Almaty ákimi Erbolat Dosaev Jetisý aýdanynda jumys sapary barysynda «Halyq qatysatyn bıýdjet» baǵdarlamasy aıasynda júzege asyrylyp jatqan Raıymbek dańǵylyndaǵy jaıaý júrginshiler kópirin jóndeý barysyn kózben kórdi, dep habarlaıdy Kazinform Almaty ákimdiginiń baspasóz qyzmetine silteme jasap.
Megapolıs basshysy kópirdiń jabyndysyn, baspaldaqtaryn kórip, qala turǵyndary úshin qurylystyń qaýipsizdigin qamtamasyz etýdiń mańyzdylyǵyn atady.
Jalpy uzyndyǵy 50 metr bolatyn kópir qurylysy Jetisý jáne Almaly aýdanyn jalǵaıdy. Kópir 70-shi jyldary salynyp, júk vagondary úshin tuıyq retinde qoldanylǵan, keıin jaıaý júrginshiler júre bastady.
Jetisý aýdanynyń ákimi Gúlnár Kókebaeva «Halyq qatysatyn bıýdjet» jobasy aıasynda jaqyn mańdaǵy úılerdiń turǵyndary ótkeldi jóndeýge bastamashy bolǵanyn jetkizdi. Kópirdiń Raıymbek dańǵylynda ekenin eskersek, bul usynysty daýys berý kezeńinde aýdannyń basqa turǵyndary da belsendi qoldaǵan.
Jóndeý jumystaryn «Lux-stroy Group» JShS merdigerlik uıymy bıyl 1 qyrkúıekte bastady, joba quny 45 mln teńge. Qazir qaýipti qorshaý jaıaý júrginshilerdiń qaýipsizdigi úshin berik qorshaýǵa aýystyryldy, relster saqtalyp, gúlzarlar úshin paıdalanyldy. Jaqyn aýmaqty kógaldandyrý aıasynda 9 týıa men 65 arsha otyrǵyzý kózdelgen. Jumys osy jyldyń 1 qarashasynda tolyq aıaqtalady.
Qala basshysy aýdan turǵyndaryna yńǵaıly bolý úshin Bókeıhanov kóshesine parallel jaıaý júrginshiler aımaǵyn uzartýdy tapsyrdy.
«Bul rette, qaýipsizdik tolyq kólemde qamtamasyz etilýi tıis», dep atap ótti Erbolat Dosaev.
Megapolıs basshysy aýdan ákimine jaryqtandyrýdy jolǵa qoıýdy, jol tósemin retke keltirip, ótkeldi múmkindigi shekteýli jandarǵa yńǵaılaýdy tapsyrdy.
«Halyq qatysatyn bıýdjet» baǵdarlamasy boıynsha bıyl Jetisý aýdanynda 40 joba júzege asyrylyp jatyr. Sonyń ishinde aýlalardy, gúlzarlar men saıabaqtardy abattandyrý jáne t.b. jobalar bar. Barlyq jobany bıyl qazan aıynyń sońyna deıin aıaqtaý josparǵa engen.
Anyqtama:
Almatyda 2023 jyldyń 13-23 qazan aralyǵynda budget.open-almaty.kz portaly arqyly aýdan ákimdikteri 2024 jyly júzege asyratyn «Halyq qatysatyn bıýdjettiń» úzdik jobalary úshin daýys berý jalǵasyp jatyr. Turǵyndardan kelip túsken 2213 jobalyq usynys qarastyrylady. Jetisý aýdanynda abattandyrý jáne damytý boıynsha bastamany 84 turǵyn kótergen. Almatyda turaqty tirkelgen ári kámeletke tolǵan turǵyndar daýys berýge quqyly. Keńesti aýdandyq ákimdikterden nemese Open Almaty ákimdiginiń Qoǵamdyq qabyldaý bólmesinen 224 39 29 (ishki. 203, 127) alýǵa bolady.
