Erbolat Dosaev: Dárihanalardaǵy baǵa narqyn retteımiz
ALMATY. QazAqparat - Almaty ákimi Baýyrjan Baıbektiń halyqpen esepti kezdesýinde qala turǵyndary densaýlyq saqtaý salasy boıynsha dárilerdiń baǵasyna qatysty shaǵym aıtty, dep habarlaıdy QazAqparat tilshisi.
«Densaýlyq saqtaý salasyna qomaqty qarajat bólinetinin bilemiz. Sala 80%-ǵa qamtamasyz etilgen. Emhanalardaǵy kezekke kelsek, bul olqylyqty elektrondy júıe arqyly joıamyz. Al dárihanalardaǵy baǵany retteý kerek. Nege dárilerdiń baǵasy birinen ekinshisine jetkenshe ózgeredi? Baǵany kim qalyptastyrady? Osy jumysty qolǵa alý kerek», - dedi Baýyrjan Baıbek Densaýlyq saqtaý basqarmasy basshysyna.
Kezdesýge qatysqan Premer-Mınıstrdiń orynbasary Erbolat Dosaev bólshek saýdadaǵy dári baǵasyn memleket óz baqylaýyna alǵanyn aıtty.
«Dárilik zattardyń aınalymyna kelsek, zań qabyldandy. Sáýirden bastap memleket bólshek saýdadaǵy baǵa narqyn retteıtin bolady. Bul Eýropadaǵy damyǵan elderdiń tájirıbesine súıenip qabyldandy. Bızneste tabys qalady. Dárilik bıznestiń tabystyq kórsetkishin biz shamamen bilemiz. Memleket bıznes pen tegin dári alatyn patsıentter arasynda durys qatynas qalyptastyrýǵa tyrysyp jatyr», - dedi Erbolat Dosaev.
Premer-Mınıstrdiń orynbasary aımaqtarda eshkimge qajeti joq dárilerge tapsyrys beriletinin aıtty.
«Biz tuńǵysh ret júıeni elektrondy qujat aınalymyna keltirdik. Bólshek saýdany baqylaıtyn bolamyz. Endi dárigerler sizge qajeti joq dárilerdi jazbaıtyn bolady. Jyl sońyna deıin bul jumysty aıaqtaımyz», - dedi ol.
«Erbolat Askarbekuly jaqsy taqyryp kóterdi. Tsıfrlyq tehnologııalar sýbektıvti faktordy boldyrmaıdy. Dárigerlerdiń de ózara baılanysy bolady. Kelgen kezde ústeliniń ústinde belgili bir fırmanyń logotıpi bar qalam jatady. Qalamdy kim bergenin túsinýge bolady. Qajeti joq retseptiń jazylatyny da sodan. Bizde sondaı bas dáriger bolǵan. Naýqastardy barynsha soryńdar degen. Ony qyzmetinen alyp tastadyq. Bul bassyzdyqty doǵarý kerek», - dedi ákim basqarma basshysyna qarap.
