Erbolat Dosaev daǵdarysqa qarsy sharalar qalaı oryndalyp jatqanyn baıandady
NUR-SULTAN. QazAqparat - Azyq-túlik qaýipsizdigin qamtamasyz etý jáne ımportqa táýeldilikti tómendetýge 400 mlrd teńge baǵyttalady. Bul týraly búgin Úkimet otyrysynda QR Ulttyq bank tóraǵasy Erbolat Dosaev aıtty, dep habarlaıdy QazAqparat tilshisi.
«Memleket basshysy bastama jasaǵan daǵdarysqa qarsy sharalardyń birinshi toptamasy aıasynda mynadaı jumys júrgizildi. Birinshiden, ekonomıkanyń basym salalaryn jeńildikpen kredıtteý baǵdarlamalary arqyly osy jylǵy 10 sáýirdegi jaǵdaı boıynsha, bankter jalpy somasy 422,2 mlrd teńgege 619 ótinim qabyldady. 292,2 mlrd teńge somaǵa 470 joba maquldandy. 153 mlrd teńge somaǵa 352 qaryz berildi», - dedi Ulttyq bank basshysy.
Onyń atap ótýinshe, Ulttyq bank osy baǵdarlamany qarjylandyrýdy 1 trln teńgege deıin 400 mlrd teńgege ulǵaıtý týraly sheshim qabyldady. Ol azyq-túlik qaýipsizdigin qamtamasyz etýge jáne ımportqa táýeldilikti tómendetýge baǵyttalatyn bolady.
«Qazaqstan Respýblıkasynyń Prezıdenti Qasym-Jomart Toqaevtyń tapsyrmasy boıynsha tótenshe jaǵdaıdyń engizilýinen zardap shekken ShOB sýbektilerin jáne jeke kásipkerlerdi qoldaýǵa arnalǵan jeńildikpen kredıtteý baǵdarlamasy ázirlenip, iske asyryla bastady. Baǵdarlama aıasynda bankterge 12 aıǵa deıingi merzimmen jalpy somasy 600 mlrd teńgege negizdelgen salymdar bólindi. Úsh aıda júzege asyrylatyn qarajatty ıgerý bastalyp ketti. Kásipkerler 647 ótinim berdi, 17,3 mlrd teńge somasyna 45 qaryz berildi», - dedi Erbolat Dosaev.
