Erbolat Dosaev Almatydaǵy eski úılerdi buzýǵa qatysty ustanymyn aıtty

ALMATY. QazAqparat- Almaty ákimi Erbolat Dosaev Áýezov aýdanynyń turǵyndarymen kezdesýinde eski paneldi úılerdi buzýǵa qatysty ustanymyn aıtty, dep habarlaıdy QazAqparat tilshisi.

Áýezov aýdanynyń turǵyny shahar basshysynan qurylys kezinde qala tarıhyn saqtap qalýdy surady.
«Eger qalada jańa turǵyn úı salýǵa jáne taǵy basqasyna ruqsat berilse ortalyqqa tıispeńizder, óıtkeni bul bizdiń tarıhymyz, almatylyq retinde men úshin óte mańyzdy», - dedi ol.
Óz kezeginde Erbolat Dosaev turǵynǵa usynysy úshin alǵysyn bildirip, byltyr qurylysqa qatysty jańa normalar qabyldanǵanyn atap ótti.
«2018 jyldan bastap qalanyń núkteli jáne tyǵyzdyǵyn shekteıtin normalar qabyldanyp jatyr. Jańa jobalardyń barlyǵy Almaty qalasynyń qala qurylysy keńesinde qaralady. Ortalyqty qazirgi qalpynda saqtaımyz desek, onda 1960, 1940 jyly salynǵan kommýnıkatsııalarmen ómir súrip jatqan adamdardy umytpaýymyz kerek. Biz tarıhı kelbetti barynsha saqtaýǵa tyrysamyz, biraq modernızatsııa sózsiz júzege asady, óıtkeni adamdar basqalar sııaqty órkenıettiń barlyq ıgiligin qoldanǵysy keledi»,-dedi ol.Aıtýynsha, paneldi úılerdi jańartý múmkin emes, olardy buzý kerek.

«Kezinde Almaty úı qurylysy kombınaty salǵan bul úıler tarıh, biraq olardy buzý kerek dep oılaımyn. Óıtkeni 25 jyldan astam ýaqyt boıy biz ósken yqshamaýdandardaǵy paneldi úıler uzaqqa tótep bere almaıdy. Tipti ol úılerdiń qabyrǵasyna dıýbeldi de qaǵa almaısyń. Qala jańartylady, tarıhı kelbetin saqtaımyz, biraq jańartý baǵdarlamasy, ınjenerlik ınfraqurylymdy jańǵyrtý tolyǵymen júzege asady», - dedi Erbolat Dosaev.