Erbolat Dosaev: Almatyǵa «baq qala» mártebesi qaıtarylady
ALMATY. KAZINFORM – Memleket basshysynyń Almatyny «jasyl qala» retinde qaıta jańǵyrtý jónindegi tapsyrmasyn oryndaý aıasynda megapolısti aýqymdy kógaldandyrý baǵdarlamasy qarqyndy júzege asyrylyp jatyr. Bul týraly Almaty ákimi Erbolat Dosaev 2025 - 2027 jyldarǵa arnalǵan qala bıýdjetiniń jobasy talqylanyp jatqan máslıhat sessııasynda málimdedi.
Negizgi bastamalardyń biri – 2022 jyly bekitilgen «Jasyl Almaty» jol kartasy. Baǵdarlamanyń basty maqsaty – 2030 jylǵa deıin 2,5 mln jasyl jelek otyrǵyzý. Jyl saıyn 320 myń aǵash pen buta otyrǵyzý kózdelgen. 2025 jylǵa deıin 1,2 mln, al 2030 jylǵa deıin shamamen 1,3 mln aǵash otyrǵyzylady.
2024 jyly 320 myń jasyl jelektiń 224 myń kósheti otyrǵyzyldy, onyń ishinde 150 myńnan astamy aǵash, al 74 myńy buta. Aǵash otyrǵyzý jumystary jalǵasýda, jyl sońyna deıin taǵy 96 myń kóshet otyrǵyzý josparlanǵan.
– Memleket basshysynyń «Almaty – baq qala» mártebesin qaıta jańǵyrtý tapsyrmasyn sapaly júzege asyrý maqsatynda 2023-2024 jyldary 500 km avtosýarý jáne tamshylatyp sýarý jelileri ornatyldy. 2025 jyly taǵy 290 km jeli tartý úshin 4,1 mlrd teńge bólinedi. Bul júıe 1 mln-nan astam aǵashty avtomatty sýarý júıesimen qamtýǵa múmkindik beredi, – dedi Erbolat Dosaev.
Aıtýynsha, «Jasyl Almaty» jol kartasy – tek ekologııalyq jaǵdaıdy jaqsartýǵa ǵana emes, sonymen qatar qala turǵyndarynyń ómir sapasyn arttyrýǵa baǵyttalǵan bastama. Jasyl jelekter mıkroklımatty jaqsartýǵa, aýa lastaný deńgeıin tómendetýge jáne jaıly qalalyq orta qurýǵa yqpal etedi.
2024 jyldyń sáýir aıynda «Almaty – bizdiń ortaq úıimiz» naýqany aıasynda «Almaty – baq qala» aktsııasy ótkizildi. Іs-shara barysynda 7 myńnan astam jasyl jelek, onyń ishinde 4 015 jemis aǵashy (onyń 3 855-i alma aǵashy), 1 090 japyraqty aǵash jáne 2 600 buta otyrǵyzyldy.
Eske salaıyq, Memleket basshysy Qasym-Jomart Toqaev Almatyǵa «jasyl qala» mártebesin qaıtarýǵa mindettimiz degen bolatyn.