Erbolat Dosaev: Almatyda 2027 jyldan bastap kólik qozǵalysy shektelýi múmkin
ALMATY. KAZINFORM - Bul týraly Almaty ákimi Medeý aýdanynyń turǵyndarymen kezdesýinde habarlady.
Kezdesý barysynda Erbolat Dosaevtan aldaǵy ýaqytta qaladaǵy kólik qozǵalysy qanshalyqty shektelýi múmkin ekeni suraldy.
- Biz transporttyq baılanys pen qoǵamdyq kóliktiń sapasyna qatysty suraqtardy sheshkennen keıin bul máseleni qarastyramyz. Nıý-Iorkte kólikke shekteýler engizilgennen keıin Manhettende kólik trafıgi azaıǵanyn jıi aıtyldy. Biraq Nıý-Iork oǵan kóp jyl daıyndaldy. Bizdiń boljam boıynsha, 2026 jyldyń sońyna qaraı kólik júıesiniń qańqasy qurylsa, 2027 jyly biz alǵashqy shekteýlerdi engizemiz. Biraq shekteýler tólem arqyly bolady. Mysaly, Almatyda tirkelgen kólik zamanaýı talaptarǵa saı kelmese, keı aımaqtarǵa kirý ol úshin aqyly bolady. Elektrli kólikter ne zamanaýı talaptarǵa saı kólikter úshin bul tegin bolady. Bul júıeni aldymen ázirleý kerek jáne bul baǵytta biz jumys istep jatyrmyz, - dedi qala ákimi.
Eske salaıyq, buǵan deıin Premer-mınıstr Oljas Bektenov Májilis depýtattarynyń saýalyna joldaǵan jaýapta Almatynyń keıbir aýdandarynda kólik qozǵalysy shektelýi múmkin ekenin jazǵan edi.