Erbolat Dosaev ákimdik pen mınıstrlikterdiń jumysyndaǵy kemshilikterdi atady
«Ótken alty aıdyń qorytyndysynan keıin keıin eki aıdyń ishinde jobalyq keńseler memlekettik ortalyq organdarmen, jergilikti atqarýshy bılikpen jumys istep jatyr. Investıtsııalyq ósimniń nátıjeleri eshkimdi qalys qaldyrmaýy tıis. Óıtkeni, syrtqy jáne ishki ınvestıtsııalardy tartý - organdar men ákimdikterdiń basty jumysy. Negizgi kapıtalǵa salynǵan ınvestıtsııalarda ósý qarqynynyń baıaýlaýy baıqalýda. Dese de, otyn-energetıkalyq keshenge salynǵan ınvestıtsııalardyń úlesi azaıyp jatqan joq», - deıdi Premer-mınıstrdiń orynbasary Úkimet otyrysynda.
Erbolat Dosaevtyń aıtýyna qaraǵanda, óńdeý ónerkásibi, aýyl sharýashylyǵy, energetıka salasyndaǵy jalpy somasy 500 mıllıon dollardan asatyn 14 joba alǵa baspaı qalǵan. Buǵan Aqmola, Aqtóbe, Qaraǵandy, Jambyl, Mańǵystaý jáne SQO-daǵy qurylys-montajdaý jumystarynyń artta qalýy sebep bolyp otyr.
«Alda kele jatqan aıdyń sońyna deıin jańa keste qarap, bıyl osy jumysty bitirý úshin birge jumys isteýimiz kerek. Jobalardyń barlyǵy da óndiris, aýyl sharýashylyǵy jáne energetıka salasyndaǵy jobalar. Almaty qalasy, Aqmola, Atyraý, Túrkistan jáne Batys Qazaqstan oblystarynda, Almaty jáne Shymkent qalalarynda 83 mln dollar somasynda óńdeý ónerkásibinde, aýyl sharýashylyǵynda jáne saýdada 11 jobany iske qosýda sátsizdikke jol berildi. Sonymen qatar, naryqqa ınvestorlar kelgen joq áli. Memlekettik ındýstrııalandyrýǵa baǵyttalǵan eleýli qarjylandyrýǵa qaramastan ótken jyly óńdeý ónerkásibi ósiminiń turaqty tómendeýi baıqaldy», - deıdi ol.
Erbolat Dosaev atap ótkendeı, búgingi kúnge deıin kásiporyndardy jańǵyrtý jáne tehnıkalyq qaıta jabdyqtaýdy yntalandyrý úshin 2025 jylǵa deıin 45 kásiporyn tańdalyp alynǵan.
«Tehnologııalyq transfertti jáne bilim berýdi damytý, jumystar men qyzmetterdiń qosymsha qundylyǵyn arttyrý boıynsha júıeli jáne sheshýshi usynystar túsken joq. Múddeli memlekettik organdar tarapynan aıqyn kemshilikter bar. Ákimdikter kórsetilgen qyzmetterdiń sapasyn jaqsartýǵa jáne Elbasynyń tapsyrmasyndaǵy densaýlyq saqtaý salasy men bilim berýdegi ónimdilikke jetkilikti nazar aýdarmaıdy. Bilim berýde barlyq qajetti zańnamalyq baza quryldy. Biraq buryn josparlanǵan kórsetkishterdiń artta qalýy baıqalady. Máselen, negizgi kapıtalǵa salynǵan ınvestıtsııalar boıynsha ındıkatorlardyń tómendeýi 10 aımaqta, atap aıtqanda Astana qalasy, ShQO, BQO, Aqtóbe, Almaty, Jambyl, Qostanaı, Qyzylorda, Túrkistan oblystarynda bekitilip otyr», - dedi ol.
Erbolat Dosaev sondaı-aq saýdada ákimdikter jańǵyrtýǵa qyzyǵýshylyq tanytpaıtynyn atap ótti.
«Máselen, Astana, Almaty, Shymkent qalalarynda jáne Almaty, Qyzylorda, Túrkistan, SQO-daǵy naryqtar men bazarlardy egjeı-tegjeıli zerdeleý talap etiledi. Bazarlar jańa formatqa kóshý kerek. Alaıda bul baǵytta eshqandaı progresti kórmeı otyrmyz», - dedi Erbolat Dosaev.
