Erbolat Dáýken Qytaıdaǵy «Halyqtyń eń jaqsy dárigeri» ataǵyna ıe boldy — sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Irannyń damý joly: 1979 jylǵy Islam revolıýtsııasynan keıingi jetistikteri – Eurasia Today
1979 jylǵy Islam revolıýtsııasynan keıin Iran burynǵy jetistikteri men tarıhı murasyn saqtaýmen ǵana shektelmeı, ǵylym men bilim berýdi, ekonomıkany, densaýlyq saqtaýdy jáne áleýmettik salany belsendi túrde damytty.
Bul týraly osy aptada Qyrǵyzstanda shyǵatyn Eurasia Today aqparat agenttigi habarlady.
Atalǵan BAQ-tyń keltirgen derekterine súıensek, Iran álemdegi saıası júıelerdiń eshqaısysyna uqsamaıtyn erekshe úshinshi damý jolyn tańdady. Bul ustanym «Batys ta emes, Shyǵys ta emes, Islam Respýblıkasy» degen uranmen kórinis taýyp, eldiń tolyq saıası, ekonomıkalyq jáne mádenı táýelsizdikke umtylysyn bildirdi.
Eurasia Today aqparat agenttiginiń málimetinshe, ótken jyldar ishinde Iran ishki damýynda da, halyqaralyq arenada da eleýli tabysqa qol jetkizdi. Búginde el álemdik saıasattaǵy belsendi oıynshylardyń biri sanalady jáne derbes, táýelsiz syrtqy saıasat júrgizip jatyr. Tipti, sanktsııalar men halyqaralyq oqshaýlaý jaǵdaıynda da Iran ózin-ózi qamtamasyz etý deńgeıine jetip, ishki óndiristi aıtarlyqtaı damytty. Bul syrtqy jetkizilimderge táýeldilikti azaıtyp, ekonomıkalyq turaqtylyǵyn nyǵaıtýǵa múmkindik berdi.
Sonymen qatar, osy aptada Eurasia Today aqparat agenttiginde «Irandyq ǵalymdar júrek tininiń ózdiginen jıyrylatyn 3D-modelin jasady» degen taqyryptaǵy aqparat jaryq kórdi.
Irandyq ǵalym Hýman Savdjı jetekshilik etken zertteý toby zerthanada adam júrek tininiń úshólshemdi modelin jasaǵan.
Eurasia Today habarlaýy boıynsha, onyń ereksheligi shynaıy aǵzanyń jumysyn qaıtalaıtyn, ózdiginen jıyrylý qabiletine ıe bolýynda.
Jańa ázirlemeniń basty artyqshylyǵy — naqty ýaqyt rejıminde mehanıkalyq derekterdi úzdiksiz ári joǵary dáldikpen jınaý múmkindigi. Bul ony qazirgi qoldanystaǵy kóptegen ádisten ereksheleıdi.
Sondaı-aq atalǵan tehnologııa aýrýlardyń shynaıy úlgilerin jasaýǵa jáne emdeý ádisterin klınıkaǵa deıingi synaqtan dálirek ári qaýipsiz ótkizý úshin óte mańyzdy qadam sanalady.
— Qazirgi ýaqytta ǵalymdar júrek-qantamyrlar patologııalarynyń arnaıy modelderin jasaý baǵytynda belsendi jumys istep jatyr. Olardyń qatarynda dılatatsııalyq kardıomıopatııa, ıaǵnı júrek qýystarynyń ulǵaıýy saldarynan onyń qandy durys aıdaı almaýy jáne arıtmııanyń ár túri bar, — dep jazady Eurasia Today.
Tashkentte Ortalyq Azııa ǵalym áıelderiniń halyqaralyq forýmy ótti — ÓzA
11 aqpan — Ǵylymdaǵy áıelder men qyzdardyń halyqaralyq kúnine oraı Tashkent qalasynda «SheSCIENCE 2026» Ortalyq Azııa ǵalym áıelderiniń halyqaralyq forýmy ótti.
Forým Ózbekstan Respýblıkasy Ǵylym akademııasy, Joǵary bilim, ǵylym jáne ınnovatsııalar mınıstrligi, Otbasy jáne áıelder komıteti, Azııa damý banki jáne TWAS — Dúnıejúzilik ǵylym akademııasynyń yntymaqtastyǵymen uıymdastyryldy.
Bul týraly «ÓzA» aqparat agenttigi málimdedi.
Habarlamada aıtylǵandaı, is-sharaǵa memlekettik basqarý organdary, halyqaralyq uıymdar, ǵylymı mekemeler men joǵary bilim berý júıesiniń ókilderi, sondaı-aq Qazaqstan, Qyrǵyzstan, Tájikstan, Túrikmenstan jáne Ózbekstannan 200-ge jýyq ǵalym áıel qatysty.
Ataýly forýmǵa qatysqan Ózbekstan Respýblıkasy Premer-mınıstriniń orynbasary — Otbasy jáne áıelder komıtetiniń tóraıymy Zýleıha Mahkamova, Joǵary bilim, ǵylym jáne ınnovatsııalar mınıstri Qýnǵıratbaı Sharıpov, Ǵylym akademııasynyń prezıdenti, Ózbekstan Qaharmany Shavkat Aıýpov elimizde áıelderdiń ǵylym salasyndaǵy belsendiligin qoldaýǵa basymdyq berilip otyrǵanyn atap ótti.
Sonymen qatar, Azııa damý bankiniń Ózbekstandaǵy ókildiginiń dırektory Kanokpan Lao-Araıa men TWAS vıtse-prezıdenti Sabah Al-Mýmın Ortalyq Azııadaǵy ǵalym áıelderdiń ǵylymı qyzmetin qoldaý, genderlik teńdikti qamtamasyz etý jáne halyqaralyq ǵylymı yntymaqtastyqty damytý máseleleri talqylandy.
Sondaı-aq, osy aptada «ÓzA»-da «Ózbekstanda dári-dármek baǵasy arzandaıdy» degen taqyryptaǵy aqparat jarııalandy.
Atalǵan aqparat kóziniń dereginshe, 2026 jyldyń 1 naýryzynan bastap Ózbekstanda birqatar dári-dármektiń baǵasy 40–60 paıyzǵa arzandaıdy. Al 1 shildeden bastap taǵy 4 myńǵa jýyq ataýdaǵy dárilik zattyń baǵasyn tómendetý josparlanyp otyr.
Bul týraly Farmatsevtıka salasyn damytý agenttiginiń aqparat qyzmetiniń basshysy Anvarhan Akabırov málimdedi.
Onyń aıtýynsha, 2025 jyly respýblıkada jalpy quny 136 mln AQSh dollaryn quraıtyn 48 jańa joba iske qosylyp, 2441 jańa jumys orny ashylǵan. Jobalar aıasynda 392 mln dollar ınvestıtsııa ıgerilgen, onyń 92 paıyzy — sheteldik ınvestıtsııalar. Bul ótken jylmen salystyrǵanda 2,3 esege kóp.
Óńirlerde jalpy quny 878 mln dollar bolatyn 39 joba júzege asyrylyp jatyr. Sonyń ishinde «Tashkent Pharma Park» farmatsevtıkalyq klasterinde 407 mln dollarlyq 13 joba ornalastyrylǵan.
— Qazirgi tańda farmatsevtıkalyq klasterdegi jobalar sany 32-ge jetip, olardyń jalpy quny 981 mln dollardy qurap otyr. Onyń ishinde 1 joba iske qosylǵan, 20 jobada qurylys, 11 jobada jobalaý jumystary júrgizilip jatyr. Respýblıkadaǵy farmatsevtıkalyq erkin ekonomıkalyq aımaqtarda quny 9,4 mln dollar bolatyn 5 joba paıdalanýǵa berilip, qosymsha 98,9 mln dollarlyq 17 ınvestıtsııalyq joba ornalastyryldy, — dep jazady ózbekstandyq BAQ.
Erbolat Dáýken «Halyqtyń eń jaqsy dárigeri» ataǵyna ıe boldy — CNR
1 qańtar kúni Beıjińde 10-kezekti «Halyqtyń jaqsy dárigerin» marapattaý rásimi ótti. Shara «2024–2025 jyldardaǵy halyqtyń qalaýly dárigerleriniń ıgi isterin nasıhattaý» taqyryby aıasynda uıymdastyryldy.
Bul týraly Qytaıdyń «Ortalyq halyq radıosy» habarlady.
Atalǵan BAQ-tyń dereginshe, bıylǵy jıyn «10 jyldyq taǵylym, halyq ıgiligi jolyndaǵy dárigerlik» uranymen ótip, áleýmettik mańyzy bar jobanyń on jyldyq qorytyndysy shyǵaryldy.
Sondaı-aq, jańa dáýir jaǵdaıynda halyq densaýlyǵyn qorǵaýǵa úles qosqan úzdik medıtsına qyzmetkerleri marapattaldy.
Qytaıdyń «Ortalyq halyq radıosy» habarlaýynsha, osy marapatqa Shyńjań ólkesi, Іle Qazaq avtonomııalyq oblysy Qorǵas qalalyq halyq aýrýhanasynyń patologııa bóliminiń aǵa dárigeri Erbolat Dáýken laıyq dep tanylǵan.
Kóktem merekesi tasymalynyń birinshi aptasynda adamdardyń aımaqaralyq qozǵalysy 1,4 mlrd-tan asty — «Halyq gazeti»
Kólik mınıstrliginiń málimetteri kórsetkendeı, 8 aqpanda, ıaǵnı Kóktem merekesi tasymalynyń jetinshi kúninde, búkil qoǵamdaǵy adamdardyń aımaqaralyq qozǵalysy 224,28 mıllıondy qurady, bul ótken jyldyń sáıkes kezeńimen salystyrǵanda 0,8%-ǵa ósti. Kóktem merekesi tasymalynyń birinshi aptasynda búkil qoǵamnyń aımaqaralyq qozǵalysy 1,413227 mlrd jolaýshyny quraıdy dep kútilip otyr. Ortasha eseppen táýligine 201,89 mln jolaýshy, bul ótken jyldyń sáıkes kezeńimen salystyrǵanda 2%-ǵa ósken, dep habarlaıdy «Halyq gazeti» basylymy.
Atalǵan BAQ-tyń deregine súıensek, temirjol arqyly jolaýshylar tasymaly 86,023 mln jolaýshyny quraıdy dep kútilip otyr, táýligine ortasha eseppen jolaýshylar aǵyny 12,289 mıllıondy quraıdy, bul ótken jyldyń sáıkes kezeńimen salystyrǵanda 0,2%-ǵa joǵary.
Al sý jolyndaǵy jolaýshylar aǵynynyń jalpy kólemi 4,891 mln, kúnine orta eseppen 699 000 jolaýshy tasymaldanady, bul ótken jyldyń sáıkes kezeńimen salystyrǵanda 14,7%-ǵa joǵary. Azamattyq avıatsııanyń jolaýshylar aǵyny 16,323 mln jolaýshy, táýligine jolaýshylar aǵyny 2,332 mln jolaýshyny quraıdy, bul da ótken jyldyń sáıkes kezeńimen salystyrǵanda 6,1%-ǵa joǵary.
Aıta keteıik, bıyl Kóktem festıvalinde jeke avtokólikpen saparlaý negizgi baǵytqa aınalǵan.
Sondaı-aq osy aptada «Halyq gazeti» basylymynda «Bıyl Qorǵas temirjol porty arqyly ótken poıyzdardyń sany 1000-nan asty» degen taqyryptaǵy aqparat jarııalandy.
Atalǵan BAQ-tyń dereginshe, Qytaı temirjoly Úrimji bólimshesinen alǵan aqparatqa sáıkes, 9 aqpandaǵy jaǵdaı boıynsha 2026 jyly Qorǵas temirjol porty arqyly 1000-nan astam Qytaı-Eýropa (Ortalyq Azııa) poıyzy ótken.
Qazir Qorǵas temirjol porty arqyly 91 temirjol jelisi bar, poıyzdar 18 eldiń 46 qalasy men aımaǵyna jetedi. Poıyzdardyń táýligine ortasha jóneltilimi 27-den asady.
Sonymen qatar 10 aqpan kúni «Halyq gazeti» basylymynda «Hýnannan Qazaqstanǵa joǵary sapaly kókónister eksporttaldy» degen taqyryptaǵy aqparat jaryq kórdi.
Keltirilgen derekterge súıensek, 9 aqpanda Hýnan ólkesiniń ıÝeıan qalasyndaǵy Tszıýnshan kókónis ǵylymı- tehnologııalyq parkinen kókónis tıelgen tońazytqysh júk kóligi Qazaqstannyń Almaty qalasyna bet alǵan.
Qytaılyq BAQ-tyń málimetinshe, Dýntın kóliniń jaǵasynan alynǵan 22 tonna kókónis partııasy Qytaıdyń ulttyq geografııalyq kórsetkish ónimderi sanalatyn «Gýansınchjoý qytaı qyryqqabaty» jáne «jalpaq qyryqqabattan» turady. Kókónister tórt kún ishinde Almatyǵa jetedi.
ıÝeıannyń Tszıýnshan aýmaǵy Qytaıdaǵy mańyzdy kókónis óndirisi bazasy jáne Hýnan ólkesindegi negizgi «kókónis sebeti» aımaǵy bolyp esepteledi. Onda 180 000 mý (1 200 600 sotyq — avt.) kókónis bazalary bar.
Irandyq zertteýshiler irgeli fızıka boıynsha álemdik syılyqtyń jeńimpazdary qatarynda — ParsToday
Irandyq zertteýshiler irgeli fızıka boıynsha álemdik syılyqtyń jeńimpazdary qatarynda.
Atap aıtqanda, 2025 jylǵa arnalǵan irgeli fızıka salasyndaǵy bedeldi Breakthrough syılyǵy Eýropalyq ıadrolyq zertteýler uıymynyń (CERN) CMS halyqaralyq yntymaqtastyǵyna berildi. Bul jahandyq syılyq tabıǵattyń qurylymyn eń az kólemde tereńirek túsinýge ákelgen sırek kezdesetin protsesterdi zertteýdegi osy ǵylymı yntymaqtastyqtyń kórnekti jetistikterin moıyndaý retinde berildi, dep jazdy ParsToday aqparat agenttigi.
Irandyq BAQ-tyń málimeti boıynsha, Irannyń irgeli ǵylymdar ınstıtýtynyń bólshekter men údetkishterdi zertteý ınstıtýtynyń zertteýshileri CMS yntymaqtastyǵynyń belsendi músheleri retinde osy bedeldi halyqaralyq marapatqa ıe bolǵandardyń qatarynda boldy. Bul qurmet álemdegi eń ozyq ǵylymı zerthanalardyń birinde CMS Iran komandasy músheleriniń jyldar boıy úzdiksiz ǵylymı, tehnıkalyq jáne atqarýshylyq kúsh-jigeriniń nátıjesi sanalady.
Halyqaralyq jas kásipkerler kongresi Ystanbulda ótti — TRT
Prezıdent apparaty janyndaǵy Investıtsııalar jáne qarjy keńsesiniń basshysy Býrak Daǵlyoǵlý memleket barlyq múmkindikteri men saıasattary arqyly kásipkerlerdi qoldaıtynyn tilge tıek etken. Onyń aıtýynsha, ótken jyly, tek 2025 jyldyń ózinde elde tek erte kezeńdegi tehnologııalyq startaptarǵa shamamen 700 mln dollar ınvestıtsııa salynǵan.
Bul týraly osy aptada Túrkııa Radıo Televızııa portaly habarlady.
«TRT»-nyń dereginshe, «Jas MÜSİAD» uıymy eki jylda bir ret ótkizetin Halyqaralyq jas kásipkerler kongresi (UGİK’26) «Bolashaq búgin» taqyrybymen bastaldy.
Ashylý saltanatynda Prezıdent apparaty janyndaǵy Investıtsııalar jáne qarjy keńsesiniń basshysy Daǵlyoǵlý, Táýelsiz ónerkásipshiler men kásipkerler qaýymdastyǵynyń (MÜSİAD) basshysy Býrhan Ózdemır, «Jas MÜSİAD» tóraǵasy Magsým Ýsta jáne UGİK atqarý komıtetiniń tóraǵasy Ómer Farýk Chelık sóz sóıledi.
«Jas MÜSİAD» tóraǵasy Ýsta iskerlik áleminde shynaıy ózgeris ákeletinder eń jaqsy tyńdaı biletinder ekenin aıtty.
Magsým Ýsta jańa býynnyń óte qabiletti ekenin, tez úırenetinin, batyl ári ózine senimdi ekenin, biraq tájirıbede jıi kezdesetin kemshiliktiń shydamsyzdyq ekenin basa aıtqan.