Erbol Myrzabosynov semserlesýden tarıhı nátıje tirkegen komandany marapattady
ASTANA. KAZINFORM – Erbol Myrzabosynov bıyl Tbılısı qalasynda ótken semserlesýden álem chempıonatynda qola júldeger atanǵan Qazaqstan Ulttyq quramasymen kezdesti. Bul týraly Týrızm jáne sport mınıstrliginiń baspasóz qyzmeti habarlady.
Mınıstr sportshylardy tarıhı jetistikke jetýimen quttyqtady. Básekeniń úshinshi orny úshin kezdesýde komanda sapyndaǵy Rýslan Kýrbanov, Vadım Sharlaımov, Elmır Álimjanov pen Kırıll Prohodov toǵyz dúrkin Olımpıada chempıony Frantsııa quramasyn senimdi jeńgen.
Sala basshysy Qazaqstan semserlesý federatsııasynyń prezıdentine, Memlekettik jattyqtyrýshy Tımýr Baıtasovqa alǵys bildirdi. Sonymen qatar mınıstr Ulttyq quramanyń tabysyna byltyr komandaǵa arnaıy shaqyrylǵan maman Aleksandr Gorbachýktyń aıryqsha úles qosqanyn atap ótti. Eske sala keteıik, onyń jetekshiligimen Japonııa quramasy Tokıo men Parıjdegi Olımpıadada, sondaı-aq 2018 jáne 2022 jylǵy jazǵy Azııa oıyndarynda chempıon atanǵan.
— Semserlesý federatsııasynyń jumysy arqyly qazir biz Memleket basshysynyń sheteldik jattyqtyrýshy tájirıbesin tıimdi paıdalaný, otandyq bapkerler men sportshylardyń biliktiligin arttyrý, Qazaqstanda jańa sport túrlerin damytý jónindegi tapsyrmasynyń tıimdi júzege asyp jatqanyn kórip otyrmyz. Búginde elimizdiń semserlesý federatsııasy úlgili sport uıymdarynyń birine aınaldy. Júıeli jumystyń arqasynda Ulttyq qurama álemniń úzdik 5 komandasynyń qataryna endi. Komandamyzdyń zor jetistikteri otandyq sportta jańa dástúr qalyptastyryp jatyr, — dedi Erbol Myrzabosynov.
Sondaı-aq mınıstr qosalqy quramda bolǵan Erlik Sertaıdyń úlesin atap ótip, árbir komandanyń múshesi jeńiske jetý jolynda mańyzdy ról atqaratynyn atap aıtty.
Osyǵan deıin Ulttyq qurama 2023 jyly Hanchjoýdaǵy Azııa oıyndarynda kúmis júldege ıe bolyp, 2024 jyly Parıjdegi Olımpıada oıyndarynda altynshy satyǵa turaqtaǵan.
Aıta ketelik Shaıbaly hokkeıden Qazaqstan kýbogyn «Saryarqa» sátti bastady.