Erbol Myrzabosynov sańlaq sportshylar Bekzat Sattarhanov pen Denıs Tenniń analarymen kezdesti
ASTANA. KAZINFORM – Týrızm jáne sport mınıstri Erbol Myrzabosynov elordada sańlaq sportshylardyń analarmen kezdesti. Atap aıtqanda, dańqty boksshy, Sıdneı Olımpıadasynyń chempıony Bekzat Sattarhanovtyń aıaýly anasy Syrlykúl Sattarhanovany jáne álemge máshhúr mánerlep syrǵanaýshy, Sochı Olımpıadasynyń qola júldegeri Denıs Tenniń ardaqty anasy Oksana Tendi qabyldady. Bul týraly vedomstvonyń baspasóz qyzmeti málim etti.
Mınıstr halyqaralyq arenada elimizdiń kók Týyn kókte jelbiretip, Ánuranymyzdy baıraqty básekelerde shyrqatqan sańlaqtar búginde aramyzdan alystap ketse de, olardyń rýhyn ulyqtaý jáne esimin el jadynda máńgi saqtaý jolynda qos ananyń aıanbaı eńbek etip júrgenin atap ótti.
«Halqymyz «Alyp anadan týady» dep beker aıtpaǵan. Shynynda da, adam boıyndaǵy asyl qasıet pen taýdaı talap ananyń aq sútimen darıdy. Ana balasyna bergen tárbıesi men sheksiz mahabbaty onyń bolashaǵyna jarqyn jol ashady. Sizder uldaryńyzdy sport úıirmesine qarshadaıynan jetelep aparyp, chempıon atanýy úshin barlyq jaǵdaıdy jasadyńyzdar. Sańlaqtarymyz aramyzdan alystap ketse de, olardyń rýhyn ulyqtaý, esimin el jadynda máńgi saqtaý jolynda aıanbaı eńbek etip júrgenderińizge kýámiz. Batyrlarymyzdyń aty óshpeı, áli kúnge deıin jas jetkinshekterdiń kýmıri bolyp kele jatqany eń aldymen, sizderdiń arqalaryńyz», – dedi Erbol Myrzabosynov.
Sondaı-aq Mınıstr kezdesý barysynda Bekzat pen Denıstiń el sportyna sińirgen eńbegi men jankúıer júreginde saqtalǵan jarqyn beınesin jańǵyrtý barshamyzǵa ortaq mindet ekenin aıtty. Sondaı-aq aldaǵy ýaqytta qos sańlaqty jastar arasynda nasıhattaý maqsatynda birlese jumys isteýge daıyn ekenin jetkizdi.
Bekzat Sattarhanov – 2000 jylǵy Sıdneı Olımpıadasynyń chempıony, Azııa chempıonatynyń kúmis júldegeri. Sondaı-aq jastar arasynda álem jáne Azııa birinshiliginiń kúmis júldegeri atanǵan.
Denıs Ten – 2014 jylǵy Sochı Olımpıadasynyń qola júldegeri, álem birinshiliginiń kúmis jáne qola medal ıegeri. Sonymen qatar tórt qurlyq chempıonatynyń jeńimpazy, Azııa oıyndary men Ýnıversıada chempıony.
