Erbol Myrzabosynov: Qazaqstanda nysana kózdeý sporty basym baǵyttardyń biri
ASTANA. KAZINFORM — Erbol Myrzabosynov Halyqaralyq nysana kózdeý federatsııasynyń (ISSF) basshysy men Azııa nysana kózdeý konfederatsııasynyń (ASC) prezıdentterimen kezdesti.
Kezdesýge ISSF prezıdenti Lýchano Rossı, ASC prezıdenti sheıh Salman Sabah ál-Salem ál-Homýd as-Sabah jáne Qazaqstan sporttyq atý federatsııasynyń bas hatshysy Oleg Pochıvalov qatysty.
Buǵan deıin ISSF prezıdenti Lýchano Rossı Memleket basshysy Qasym-Jomart Toqaevpen kezdesýde elimizdiń nysana kózdeý sportyn damytýǵa erekshe kóńil bólinip jatqanyn atap ótti. Ol aldaǵy ýaqytta da nysana kózdeý men stend atýdy qoldap, sheteldik áriptestermen yntymaqtastyqty tereńdetýge belsendi atsalysýǵa daıyn ekenin bildirdi.
Óz kezeginde Halyqaralyq nysana kózdeý federatsııasy men Azııa konfederatsııasynyń basshylary Qazaqstan Prezıdentine atalǵan sport túrin damytýǵa kórsetip otyrǵan qoldaýy úshin alǵys aıtty.
Memleket basshysy Lýchano Rossı men sheıh Salman Sabah ál-Salem as-Sabahty II dárejeli «Dostyq» ordenimen marapattady. Erbol Myrzabosynov Qazaqstanda nysana kózdeý sporty basym baǵyttardyń biri ekenin atap ótti.
Búginde elimizde nysana kózdeýmen 18 myńnan astam adam aınalysady. Atalǵan kezdesý 16–30 tamyz kúnderi Shymkent qalasynda ótetin Azııa chempıonatynyń qarsańynda ótkenin atap ótken jón. Sary qurlyq dodasyna 26 elden 800-ge jýyq sportshy qatysady.
Іs-sharany Qazaqstannyń sporttyq atý federatsııasy Týrızm jáne sport mınıstrliginiń qoldaýymen uıymdastyrýda.
Aıta keteıik, Memleket basshysynyń halyqaralyq sport uıymdarymen yntymaqtastyqty arttyrý jónindegi tapsyrmasyn iske asyrý aıasynda bıyl jyl basynan beri elimizge 19 halyqaralyq sport federatsııasy men uıymynyń basshysy keldi.
Eske sala keteıik, buǵan deıin Halyqaralyq nysana kózdeý federatsııasy (ISSF) jáne Nysana kózdeýden Azııa konfederatsııasynyń (ASC) jetekshilerin Memleket basshysy Aqordada qabyldady.