Erbol Myrzabosynov: Qazaqstan álemdik paralımpıadalyq arenada bedelge ıe
ASTANA.KAZINFORM — Qazaqstan ókilderi Azııa Paralımpıadalyq komıtetiniń qurylymdarynda negizgi pozıtsııalardy ıelenip, mańyzdy sheshimderdi ázirleýge belsendi qatysyp otyr.
Bul týraly Qazaqstan týrızm jáne sport mınıstri Erbol Myrzabosynov Astanada ótip jatqan Azııa Paralımpıada komıtetiniń (APK) Konferentsııasy men 8-shi Bas Assambleıasy ashylý saltanatynda aıtty.
Erbol Myrzabosynovtyń aıtýynsha, Qazaqstan álemdik paralımpıadalyq arenada bedelge ıe.
— Qazaqstan Respýblıkasynyń Ulttyq Paralımpıadalyq komıteti 2002 jyldan bastap belsendi jumys istep keledi. Bizdiń eldiń ókilderi Azııa Paralımpıadalyq komıtetiniń qurylymdarynda negizgi pozıtsııalardy ıelenip, mańyzdy sheshimderdi ázirleýge belsendi qatysyp otyr, — dedi mınıstr óz sózinde.
Myrzabosynov elimizdegi paralımpıadalyq sporttyń damýy týraly toqtaldy.
— Qazaqstanda toǵyz paralımpıadalyq sport túri damyǵan. Jyl saıyn bul sala 10 myńǵa jýyq adamdy qamtıdy. 80-nen astam halyqaralyq jáne 56 respýblıkalyq jarystar ótkiziledi. Qazaqstandyq paralımpıadashylardyń jetistikteri de joǵary. Aty ańyzǵa aınalǵan Zúlfııa Ǵabıdýllına, Aleksandr Kolıadın, Davıd Degtıarev, Aqmaral Naýatbek syndy sportshylardyń altyn júldelerin erekshe atap ótý qajet. Olardyń jeńisi men jigeri jańa býyn sportshylaryna shabyt berip, qanat bitiredi. Mundaı nátıjelerge júıeli jumys pen memlekettik qoldaýdyń arqasynda qol jetkizildi, — dedi ol.
QR týrızm jáne sport mınıstri halqaralyq áriptestikke múddeli ekenin aıtty.
— Biz Halyqaralyq Paralımpıadalyq komıtetpen (IPC) jáne Azııa Paralımpıadalyq komıtetimen (APC) tyǵyz áriptestikke múddelimiz. Halyqaralyq jarystardy ótkizý, tóreshiler men jattyqtyrýshylar quramyn damytý, bilim berý bastamalary men daıyndyq baǵdarlamalaryna qatysý — basty nazarymyzda, — dedi Myrzabosynov.
Osyǵan deıin habarlaǵanymyzdaı, Qazaqstan alǵash ret Azııa Paralımpıada komıtetiniń (APK) Konferentsııasy men Bas Assambleıasyn ótkizip jatyr.