Erbol Myrzabosynov basketboldan Qazaqstan kýboginiń jeńimpazdarymen kezdesti
AQTAÝ. KAZINFORM — Týrızm jáne sport mınıstri Erbol Myrzabosynov Aqtaý qalasyna barǵan jumys saparynda oblys ákimi Nurdáýlet Qılybaımen birge «Kaspıı» basketbol klýbynyń oıynshylarymen kezdesti. Bul týraly QR Týrızm jáne sport mınıstrligi jazdy
2008 jyly qurylǵan «Kaspıı» basketbol klýby búginde óńirdegi jetekshi sport ujymdarynyń birine aınaldy. Klýbtyń erler jáne áıelder komandalary Ulttyq lıgada tabysty óner kórsetip, Qazaqstan kýboginde oblys namysyn abyroımen qorǵap júr. Bıyl erler komandasy Qazaqstan kýboginde jeńimpaz atanyp, óńir tarıhyndaǵy alǵashqy iri jetistikke qol jetkizdi. Qazirgi tańda klýbtyń 10-nan astam oıynshysy ulttyq qurama sapynda óner kórsetedi.
Kásibı komandalarmen qatar klýb sporttyq rezervti de belsendi túrde damytyp keledi. Máselen, komandanyń U14 jáne U21 jas erekshelikterindegi quramalary el chempıonattaryna qatysady. Sondaı-aq 100-den astam bala áýesqoı basketbolmen turaqty túrde aınalysady. Jyl saıyn óńirde 800-den astam jas sportshy qatysatyn Jastar basketbol lıgasy jáne Áýesqoılar lıgasy sekildi iri týrnırler ótkiziledi.
Erbol Myrzabosynov klýbtyń jetistikteri men jastardyń sportqa tartylýy óńirdiń dene shynyqtyrý men buqaralyq sportty damytýdaǵy júıeli jumystyń aıqyn kórinisi ekenin atap ótti.
— Qazirgi tańda oblys halqynyń 41%-y (shamamen 400 myń adam) sportpen turaqty túrde shuǵyldanady. Al mektep oqýshylarynyń 70%-dan astamy sport sektsııalarymen qamtylǵan. Memlekettik sporttyq tapsyrys pen Damubala.kz platformasynyń arqasynda 5 myńnan astam bala 22 sport túri boıynsha tegin jattyǵýǵa múmkindik alyp otyr, — delingen aqparatta.
Búginde óńirde 931 sport nysany jumys isteıdi. Byltyr oblysta 65 jańa alań men keshen paıdalanýǵa berildi. Sondaı-aq jańa sport zaldary men mamandandyrylǵan sport ǵımarattarynyń qurylysy júrgizilip jatyr.
Mınıstr «Shoqyr Bóltekuly atyndaǵy Mańǵystaý oblystyq joǵary sport jetistikteri mektebi» janynan ashylǵan zamanaýı «Halyq Arena» keshenin aralap kórdi. Keshen bazasynda dzıýdo, boks, taekvondo, erkin jáne grek-rım kúresine arnalǵan zaldar, basseın, jattyǵý bólmeleri, ashyq alańdar men 90 oryndyq qonaq úı ornalasqan. Munda 300-den astam bala, sonyń ishinde ulttyq qurama músheleri, álem jáne Azııa chempıonattarynyń jeńimpazdary men júldegerleri jattyǵady.
Erbol Myrzabosynov Mańǵystaý oblysynyń buqaralyq jáne kásibı sportty damytýda aıtarlyqtaı jetistikke jetip otyrǵanyn, sondaı-aq jasalyp jatqan jaǵdaılar halyqaralyq deńgeıdegi sportshylardy daıarlaýǵa jol ashatynyn erekshe atap ótti.
Eske sala keteıik, paralımpıadalyq at sportynan el birinshiliginde elordalyqtar 5 medal jeńip aldy.