Erbol Qarashókeev úsh jyldyń ishinde sút ónimi sapasyn kóterý qalaı júretinin aıtty

NUR-SULTAN. QazAqparat – Búgin Májiliste «Jeke qosalqy sharýashylyq týraly» zań jobasyn talqylaý kezinde sút ónimderiniń sapasyna qatysty problemalar aıtyldy, dep habarlaıdy QazAqparat tilshisi.

Atalǵan qujatty tanystyrý barysynda Májilis depýtaty Erlan Saırov EAEO tehnıkalyq reglamenti aıasynda Qazaqstanda jeke qosalqy sharýashylyqtardan sút qabyldaý máselesin kóterdi.

«2025 jylǵy 1 qańtardan bastap Eýrazııalyq ekonomıkalyq odaq tehnıkalyq reglamenti aıasynda Qazaqstanda jeke qosalqy sharýashylyqtardan sút zaýyttaryna sút qabyldaýǵa tyıym salynady. Ózińiz bilesiz, bizdiń qosalqy sharýashylyqtardyń sút ónimi tamaq ónimi qaýipsizdigi talaptaryna sáıkes kelmeıdi. Búginde jeke qosalqy sharýashylyqtarda 70 paıyzy, ıaǵnı 5 mln-ǵa jýyq adam aýylda osy sútti ótkizip, nápaqasyn taýyp otyr. Endi, 2025 jylǵa deıin úsh jyl qaldy, osyny sheshý úshin qandaı qadamdar jasaldy? Úsh jyldyń ishinde bul máseleni sheshýge bizdiń jaǵdaıymyz jete me? Sebebi bul máseleniń áleýmettik mańyzy zor», - dedi E. Saırov.

Óz kezeginde Aýyl sharýashylyǵy mınıstri Erbol Qarashókeev osy másele óte kúrdeli ekenin, sondaı-aq úsh jyldyń ishinde atalǵan problemany sheshý mindetti bolyp turǵanyn atap ótti.

«2025 jyldan bastap bizde sút óńdeý zaýyttary jeke qosalqy sharýashylyqtardan jınap otyrǵan súttiń sapasyna mindettemeni kóteredi. Osy oraıda bizdiń 40-50 paıyz sút óńdeıtin zaýyttardyń qabyldap otyrǵan ónimdi jeke qosalqy sharýashylyqtardan ala almaı qalady. Sol sebepten búgin qarastyryp otyrǵan zań jobasy óte mańyzdy. Qazirgi tájirıbeni qaraıtyn bolsaq, Tatarstanda, Bashqurtstanda tıisti zańdardyń aıasynda jeke qosalqy sharýashylyqtardaǵy iri qaranyń, súttiń sapasyn kóterýde biraz jumys atqardy. Sol sebepti Tatarstanǵa saparmen baryp, tájirıbesimen tanyspaqpyn», - dedi mınıstr.

E. Qarashókeev atalǵan máseleni júıeli túrde sheshý kerek ekenin atap ótti. Bul baǵyttaǵy tıisti jumystardy kooperatsııa arqyly sheshýge bolady.

«Tanystyrylyp otyrǵan zań jobasynyń maqsattarynyń biri atalǵan máselelerge de arnalǵan. Jeke qosalqy sharýashylyqtardyń kooperatıvterge birigip, osy arqyly memlekettik qoldaý alyp, ózderiniń ónimderiniń sapasyn kótere alady», - dedi vedomstvo basshysy.

Osy baǵytta asyl tuqymdy iri qara maldy kóbeıtý, mamandardy tartý jáne basqa da jumystardy kooperatıvter arqyly biriktirip, jeke qosalqy sharýashylyqtarǵa qoldaý jasalmaq.