Erbol Qarashókeev sýıtsıdtiń aldyn alý sharalarynyń álsizdigin synǵa aldy
ASTANA.KAZINFORM — Jambyl oblysynyń ákimi Erbol Qarashókeev quqyq qorǵaý organdary men basqarma basshylarynyń, Taraz qalasy men aýdan ákimderiniń, óńir boıynsha bala quqyqtary jónindegi ýákildiń basyn qosyp, kámeletke tolmaǵandar arasyndaǵy ózekti máselelerdi talqylady.
Basqosýda sýıtsıd, quqyq buzýshylyq, qylmys, zorlyq-zombylyq jáne erte júktiliktiń aldyn alý sharalaryna erekshe nazar aýdaryldy.
Keńes barysynda polıtsııa departamenti bastyǵynyń orynbasary B. Janaevtyń, bilim basqarmasynyń basshysy N. Orshybekovtiń, densaýlyq saqtaý basqarmasynyń basshysy S. Nazarbektiń, Baızaq aýdanynyń ákimi O. Baqqaraevtyń jáne basqa da jaýapty tulǵalardyń baıandamasy tyńdaldy.
Erbol Qarashókeev oblysta balalar men jasóspirimder arasyndaǵy sýıtsıdtiń aldyn alý jumystary álsiz ári tıimsiz júrgizilip jatqanyn atap ótip, buǵan deıin tirkelgen derekterdi tereń taldaýdy tapsyrdy.
– Óńirimizde jasóspirimderdiń óz-ózine qol jumsaý faktileri jıilep barady. Bul – qoǵam úshin dabyl qaǵatyn, asa alańdatarlyq jaǵdaı. Mundaı keleńsiz jaǵdaılardyń aldyn-alý, sebebimen kúres jumystary óz nátıjesin bermeı otyr, – dep sózin bastady oblys ákimi.
Sonymen qatar bilim berý uıymdary men ata-ana arasyndaǵy baılanysty nyǵaıtý, psıhologtardyń kásibı biliktiligin arttyrý, sondaı-aq balalar men jasóspirimderdiń bos ýaqytyn tıimdi uıymdastyrý boıynsha naqty mindetter júktedi. Bul baǵyttaǵy jumystarǵa atsalýy tıis «Aqsaqaldar», «Analar» jáne Qoǵamdyq keńesti, «Ájeler» mektebi men úkimettik emes uıymdardyń deńgeıi men áleýetine barynsha nazar aýdarý qajettigin eskertti.
– Baıandamashylardy tyńdasaq, aýqymdy jumys júrgizip jatqan sekildi. Biraq, nátıjesin kórip turǵan joqpyz. Jumys tek esep berý nemese reıtıng qýalaý úshin emes, shynaıy nátıje úshin júrgizilýi kerek. Sebebi, balalarymyzdyń ómirinen qymbat eshteńe joq! Zerdeleý jumystary kezinde januıalardyń áleýmettik-turmystyq jaǵdaıyna erekshe nazar aýdarý qajet. Tolyq emes otbasyndaǵy ár balaǵa jeke jospar jasalyp, tıimdi sheshimder qabyldanýy tıis, – dedi oblys ákimi.
Keńes qorytyndysy boıynsha Baızaq aýdany ákiminiń salaǵa jaýapty orynbasaryna qatań eskertý berildi. Talas, Shý, Qordaı aýdany ákimderi orynbasarlarynyń tártiptik jaýapkershiligin qaraý tapsyryldy.
Erbol Qarashókeev salaǵa jaýapty oblys ákiminiń orynbasarlarynan, jaýapty tulǵalardan qurǵaq sóz emes, naqty qadamdar kútetinin taǵy bir márte eske saldy.
– Memleket basshysynyń bastamasymen balalardyń bolashaǵy men eldiń keleshegi úshin úlken múmkindikter jasalyp jatyr. Óńirimizdiń ózinde jyl saıyn mektepterdiń materıaldyq-tehnıkalyq bazasy jaqsaryp, jańa bilim berý nysandary salynyp jatyr. Osyny eskersek, bilim sapasyna, pedagogterdiń biliktiligine jáne balalardyń qaýipsizdigine erekshe nazar aýdarylýy tıis, – dedi oblys ákimi.
Aıta ketelik sýıtsıdke beıim jastar áskerge alynbaıtyny týraly jazǵan edik.