Erbol Qarashókeev mal jaıylymdarymen qamtamasyz etý máselesi qalaı sheshiletinin aıtty
«Halyqty mal jaıylymdarymen qamtamasyz etý máselesin jeke qosalqy sharýashylyqtardy kooperatsııalaý jáne mundaı kooperatıvterge bosalqy jer qorynan ári rezervtik jer qorynan jer alqaptaryn berý arqyly sheshý josparlanýda. Qazirgi ýaqytta biz «Jeke qosalqy sharýashylyq týraly» zań jobasyn ázirlep, Parlament Májilisine engizdik, onda osy jaıttardyń barlyǵy kórinis tapty», - dedi E. Qarashókeev.
Onyń aıtýynsha, aýyl sharýashylyǵy maqsatyndaǵy jer ýchaskeleriniń shekti mólsherlerin aıqyndaý maqsatynda QR Úkimeti deńgeıinde memlekettik organdardyń, sarapshylardyń jáne ǵylymı ınstıtýttardyń qatysýymen arnaıy jumys toby qurylyp jatyr. Aýdandar (qalalar), oblystar bólinisinde aýyl sharýashylyǵy jerleriniń eń joǵary mólsherlerin Jerlerdiń aımaqtarǵa bólinýin eskere otyryp, ákimshilik-aýmaqtyq birlikterdiń aýyl sharýashylyǵy jerlerine jáne basqa sanattaǵy jerlerge arnalǵan jer-sharýashylyq ornalastyrý josparlary (eldi mekenderdiń bas josparlaryna uqsas) ázirlenip, ókildi jáne atqarýshy organdardyń birlesken sheshimderi qabyldanǵannan keıin bekitý usynylady.
«Jalpy, aýyl sharýashylyǵy maqsatyndaǵy jer ýchaskeleriniń shekti (eń joǵary) mólsherleri 2022 jylǵy 1 mamyrǵa deıin bekitiletin bolady», - dedi mınıstr.
Budan buryn habarlanǵandaı, QR Aýyl sharýashylyǵy mınıstri Erbol Qarashókeev 3,2 mln gektar jer memlekettik menshikke qaıtarylǵanyn aıtty.
