Erbol Hamıtovtiń altyn medalinen keıin Paralımpıadada Qazaqstan quramasy 18-orynǵa kóterildi
ASTANA. KAZINFORM – Para bıatlonshy Erbol Hamıtovtiń Paralımpıada chempıony atanǵannan keıin Qazaqstan quramasy medaldar kestesinde qaı orynǵa jaıǵasqany belgili boldy.
Qazaqstandyq Erbol Hamıtov dúbirli doda barysynda qazirge deıin bir altyn jáne bir qola medal alyp úlgerdi. Ol búgin para bıatlonnan 4,5 shaqyrymdyq iz kesý jarysynda (otyryp jarysý sanaty) jeńistiń eń bıik tuǵyryna kóterildi. Oǵan deıin 10 naýryzda para shańǵy jarysynan 1 500 metrge klassıkalyq sprınt jarysynda qola medal jeńip alǵan edi.
Qazir Qazaqstan quramasy medaldar kestesinde 1 altyn jáne 1 qola medalmen 18-orynǵa jaıǵasty. Bul kestede Qytaı 33 (12 altyn, 9 kúmis, 12 qola) kósh basynda tursa, odan keıingi oryndardaǵy AQSh - 19 (9-5-5), Italııa - 14 (6-7-1) medali bar. Sondaı-aq alǵashqy ondyqta Aýstrııa, Frantsııa, Reseı, Ýkraına, Shvetsııa, Germanııa jáne Kanada quramalary keledi.
Qysqy Paralımpıada oıyndarynda Qazaqstan ulttyq quramasy para shańǵy jarysy men para bıatlon sport túrleri boıynsha el namysyn qorǵap jatyr. Bıylǵy dúbirli dodada Qazaqstan quramasy para shańǵy jáne para bıatlon sport túrleri boıynsha synǵa túsedi. Halyqaralyq arenada Qazaqstan atynan 7 sportshy baq synaıdy. Olardyń qatarynda Erbol Hamıtov, Nurlan Álimov, Aleksandr Gerlıts, ıÝrıı Berezın, Vladıslav Kobal, Sergeı Ýsoltsev jáne Anna Gracheva bar.
Qurama sapyndaǵy eń jas sportshy – para shańǵy jarysynda óner kórsetetin 17 jastaǵy Vladıslav Kobal. Al komandanyń eń tájirıbeli ári jasy úlken múshesi – para shańǵy jáne para bıatlonnan baq synaıtyn Sergeı Ýsoltsevtiń jasy 51-ge keldi.
Buǵan deıin qazaqstandyq para bıatlonshy Erbol Hamıtov Paralımpıada chempıony atanǵanyn jazǵan edik.
