Erbol Hamıtovqa «Qazaqstannyń eńbek sińirgen sport sheberi» ataǵy berildi
ASTANA. KAZINFORM - Qazaqstan Respýblıkasy Týrızm jáne sport mınıstri Erbol Myrzabosynov para bıatlonnan Mılanda ótken qysqy Paralımpıada chempıony Erbol Hamıtovpen jáne jattyqtyrýshylarymen kezdesti, dep habarlaıdy mınıstrliktiń baspasóz qyzmeti.
Kezdesý barysynda mınıstr otandyq sporttyń damýyna qosqan eleýli úlesi men halyqaralyq arenalardaǵy joǵary jetistikteri úshin Erbol Hamıtovqa «Eńbek sińirgen sport sheberi» ataǵyn tabystady.
Erbol Hamıtov – Qazaqstannyń para sporttaǵy álemdik deńgeıdegi jetekshi sportshylarynyń biri. Onyń basty ereksheligi – ámbebaptyǵy. Ol para shańǵy jarysy men para bıatlonda birdeı joǵary nátıjeler kórsetip, tózimdilik, dáldik jáne taktıkalyq sheberlikti sheber ushtastyra biledi. Sonymen qatar ol para bıatlonnan Álem kýboginiń jalpy esebinde jeńiske jetip, Hrýstal globýsty ıelengen Qazaqstan tarıhyndaǵy alǵashqy sportshy atandy.
Sondaı-aq ol jýyrda Italııanyń Mılan-Kortına qalalarynda ótken XIV qysqy Paralımpıadada Erbol Hamıtov el qorjynyna para bıatlonnan altyn, para shańǵy jarysynan qola medal saldy.
Budan bólek, mınıstr Erbol Hamıtovtyń jattyqtyrýshylary – Aslan Toqbaev, Vasılıı Kolomıets jáne Anton Jdanovıchti Qurmet gramotasymen marapattady.
Buǵan deıin Memleket basshysy Erbol Hamıtovqa ІІІ dárejeli «Barys» ordenin tabystaǵan bolatyn. Al Vasılıı Kolomıets pen Anton Jdanovıch «Parasat» ordenimen, Aslan Toqbaev «Qurmet» ordenimen marapattaldy.
Kezdesý barysynda Erbol Myrzabosynov myqty sportshylar men kásibı sport menedjerlerin qoldaýdyń mańyzyn erekshe atap ótti. Óıtkeni olardyń jetistikteri Qazaqstannyń halyqaralyq deńgeıdegi bedelin arttyrýǵa zor úles qosady.
Aıta keteıik, búginde elimizde para sporttyń 19 túri qarqyndy damyp keledi. 2025 jyldyń qorytyndysy boıynsha 66 159 múmkindigi shekteýli azamat júıeli túrde dene shynyqtyrý jáne sportpen aınalysady. Qazirgi tańda respýblıkada múmkindigi shekteýli jandarǵa arnalǵan Respýblıkalyq sporttyq daıarlaý ortalyǵy, 16 sport klýby, Almaty oblysynda sportty damytý dırektsııasy jáne 2 arnaıy sport mektebi jumys isteıdi.
Osyǵan deıin Prezıdent Paralımpıadada sportshylardyń jeńiske jetýine úles qosqan azamattarǵa rızashylyǵyn bildirgen bolatyn.
