Erbol Hamıtov: Ózgelerdi shabyttandyrý — naǵyz marapat
ASTANA. KAZINFORM — Mılan qalasynda para bıatlon men para shańǵy sportynan altyn jáne qola júlde ıelengen 28 jastaǵy sportshy Erbol Hamıtovke demeýshiler atynan Astanadan eki bólmeli páterdiń sertıfıkaty tabystaldy.
Erbol Hamıtov jýrnalısterge bergen suhbatynda Paralımpıada júldesine deıin júrip ótken jolyn aıtyp berdi. Ol 19 jasynda aýyr jaraqat alǵanyn — tizesine oq tıip, sonyń saldarynan aıaǵy tizeden tómen ampýtatsııalanǵanyn aıtty. Ol osy qıyndyqqa qaramastan sportqa qaıta oralǵan. Sportshy jaraqat alǵanǵa deıin grepplıng jáne kúrespen aınalysqan.
— Men uzaq ýaqyt ózimniń múgedek ekenimdi moıyndamadym, bul jaǵdaıǵa beıimdelý óte qıyn boldy. Biraq tálimgerlerimniń arqasynda ózime qaıta senim paıda bolyp, bıatlon jáne shańǵy jarysymen aınalysa bastadym, — dep bólisti Hamıtov.
Erbol eń mańyzdysy aqsha emes, qundylyqtar ekenin erekshe atap ótti.
— Aqsha men úshin eshqashan birinshi orynda bolǵan emes. Eń bastysy — ar-namys pen qadir-qasıet, kez kelgen jaǵdaıda adam bolyp qalý. Árıne medaldar men syıaqylar qýantady, biraq men úshin eń úlken marapat ózgelerge úlgi kórsetip, basqalardy shabyttandyrý, — dep atap ótti.
Sportshynyń aıtýynsha, jarysta jeńiske jetýine memleket tarapynan kórsetilgen qoldaý úlken ról atqarǵan.
— Eger Memleket basshysynyń qoldaýy, Týrızm jáne sport mınıstrliginiń demeýi bolmasa, búgin bul jerde turmas edim, — dedi ol.
Erbol Paralımpıada kezindegi qıyndyqtar týraly aıtyp, shańǵy jarysyndaǵy qola medaldiń ózi úshin qanshalyqty qundy ekenin atap ótti.
— Bıatlonda alǵashqy kúnderi atý kezinde psıhologııalyq turǵydan qıyn boldy, biraq men kúresýdi toqtatpadym. Al shańǵy jarysynda tartys óte kúshti boldy: men jeńimpazdan nebári bir sekýndqa ǵana qalyp qoıdym. Sondyqtan men úshin bul qola medal altynnan da qymbat, — dep qosty sportshy.
Erbol Hamıtov óziniń kúsh-jigeri týraly da sóz qozǵady.
— Men ózimdi qaıtadan tóbeden shanamen syrǵanap bara jatqan bala sııaqty elestettim. Bul maǵan senimdilik pen shabyt alýyma kómektesti, - deıdi ol.
Sondaı-aq sportshy aldaǵy josparlary týraly da aıtty.
— Aldaǵy maqsat — jarystarǵa qatysyp, jańa saıystarǵa daıyndalý. Para esý jáne kanoe esý boıynsha jazǵy Olımpıada oıyndaryna qatysý múmkindigin qarastyramyn. Biraq bul týraly aıtýǵa áli erte, sheshimdi jattyqtyrýshylarmen birge muqııat josparlaý qajet, — dedi ol.
Erboldyń áńgimesi paralımpıadashyny kútip alý úshin áýejaıǵa kelgen qazaqstandyq Nadejda Letıaıkınany da shabyttandyrdy.
— Oǵan qaraǵan kezde siz jaı ǵana sportshyǵa emes, óz qıyndyqtaryn qanatqa aınaldyrǵan adamǵa qarap turǵandaı sezinesiz. Bul adamdy shabyttandyrady! — dedi Nadejda Letıaıkına.
Erbol Hamıtov Qazaqstan jastaryn qıyndyqtan qoryqpaýǵa, óz maqsatyna umtylýǵa, óz kúshine senýge jáne sportta da, ómirde de jańa belesterdi baǵyndyrýǵa shaqyrdy.
Eske salaıyq, 2026 jylǵy qysqy Paralımpıada oıyndary kezinde Hamıtov para bıatlon boıynsha erler arasynda 4,5 shaqyrym qashyqtyqta qýyp jetý jarysynda chempıon atandy. Ol márege 9 mınýt 39 sekýndta jetip, altyn medal jeńip aldy.
Kúmis medaldi ýkraın sportshysy Taras Rad ıelendi (21,5 sekýndqa qalyp qoıdy), al qola júldeni qytaılyq shańǵyshy Lıý Tszysıýı aldy (32,5 sekýnd artta qaldy).
Sonymen qatar Hamıtov 1,5 shaqyrym sprınttik shańǵy jarysynda qola medal jeńip aldy. Bul jarysta jeńisti Lıý Tszysıýı (2 mınýt 28,9 sekýnd) ıelendi, kúmis medaldi brazılııalyq Krıstıan Vestemaıer Rıbeırý (2 mınýt 29,6 sekýnd) aldy, al Erbol saıysty 2 mınýt 29,9 sekýnd nátıjemen aıaqtady.
Buǵan deıin qysqy Paralımpıada oıyndarynyń chempıony Erbol Hamıtov Qazaqstanǵa oralǵany týraly jazdyq.