Erbaıan Muhtardyń densaýlyǵy tolyq ne ishinara qalpyna keletindeı múmkindik bar ma

ASTANA. KAZINFORM — Densaýlyq saqtaý mınıstriniń orynbasary Tımýr Muratov Úkimet otyrysynan keıin ótip jatqan baspasóz máslıhatynda áskerde júrip komaǵa túsken Erbaıan Muhtardyń ońalyp ketý múmkindigi týraly pikir bildirdi. 

— Erbaıan Muhtardyń densaýlyǵy tolyq nemese ishinara qalpyna keletindeı múmkindik bar ma? — dep surady jýrnalıst.

Vıtse-mınıstr jaýabyn «ókinishke qaraı» degen sózben bastady.

— Ókinishke qaraı, naýqasymyz óte aýyr jaraqat alǵan. Mamandardyń baǵalaýynsha, onyń ońalyp ketý áleýeti sonsha úlken emes. Ol kórsetkishti únemi qaıta-qaıta baǵalap otyrý kerek. Jýyqta ǵana Túrkııadaǵy klınıkadan keldi. Ókinishke qaraı, ol jaqta qandaı ońaltý qyzmetin alǵanyn aıta almaımyn. Úıine jetkizdik. Kez kelgen memleket óz azamattaryn shetelden asa jaıly sanıtarlyq ushaqpen aldyra almaıtynyn túsiný kerek. Mańaıdaǵy kórshi elderdiń ishinde ondaı qyzmet usyna alatyn elder az, — dedi ol.

Onyń sózine qaraǵanda, mundaı sanıtarııalyq kóliktiń bir ushqanynyń ózi 50-60 mln teńgege shyǵady.

— Densaýlyq saqtaý mınıstrligi bul joly ol azamattyń emin de ishinara ótep berdi. Memleket em baǵasy qansha bolǵanyna qaramastan azamattarymyz úshin bárin jasaýǵa ázir. Mamandar toby men sarapshylar bul naýqasty ári qaraı da emdeı beredi. Budan ári ońaltý jumystary qaı baǵytta, qandaı tásilmen júrý kerektigin baǵalaıdy. Osy tásilmen sheshim shyǵarady, — dedi vıtse-mınıstr.

Aıta keteıik, búgin Úkimet halyqty dári-dármekpen qamtamasyz etý jaıyn talqylady.