Erbaıan Muhtardyń ólimine baılanysty kim jazalanady — Qorǵanys mınıstrliginiń jaýaby
ASTANA. KAZINFORM — QR Qorǵanys mınıstriniń qarý-jaraq jáne áskerı tehnıka jónindegi orynbasary Shaıh-Hasan Jazyqbaev Erbaıan Muhtardyń óliminen keıin zań aldynda kim jaýapkershilikke tartylatyny jóninde málimdeme jasady.
Senat kýlýarynda jýrnalıster suraǵyna jaýap bere otyryp, aldymen ol áskerı qyzmetshiniń ata-anasyna, baýyrlaryna, týystaryna jáne komandırlerine Qorǵanys mınıstrliginiń atynan kóńil aıtty.
— Kim jazalanady degenge kelsek, ol týraly qylmystyq is qozǵalǵan. Sonyń sheshimi boıynsha jazalanady jáne tártiptik jazalardy Ulttyq ulannyń basshylyǵy qoldanady. Tekseris júrgizý Іshki ister mınıstrliginiń quziretinde. Qorǵanys mınıstrligi bul jaıynda tekseris júrgizip jatqan joq. Sonymen qatar, Іshki ister mınıstrliginen bólek, áskerı prokýratýra t. b. organdar tekserip jatyr. Basynda emdegen kezde kómegimizdi berdik. Keıin otbasymen baılanysta boldyq. Osy ýaqytqa deıin Qorǵanys mınıstrligi qoldan kelgen barlyq kómekti kórsetti. Meniń oıymsha, Ulttyq ulannyń basqarmasy jerleý rásimine qatysady, — dedi Shaıh-Hasan Jazyqbaev.
Aıta keteıik, buǵan deıin Shaıh-Hasan Jazyqbaev áskerde qaýipsizdikti qamtamasyz etý jóninde málimdeme jasaǵanyn jazǵanbyz.
