Erbaıan Muhtardyń ólimi: Qorǵanys mınıstrliginiń málimdemesi
ASTANA. KAZINFORM – QR Qorǵanys mınıstriniń qarý-jaraq jáne áskerı tehnıka jónindegi orynbasary Shaıh-Hasan Jazyqbaev áskerde qaýipsizdikti qamtamasyz etý jóninde málimdeme jasady.
Senat kýlýarynda jýrnalıster oǵan 2023 jyly áskerı qyzmetti ótkerý kezinde aýyr bas súıek-mı jaraqatyn alǵan Ulttyq ulannyń burynǵy áskerı qyzmetshisi Muhtar Erbaıannyń óliminen keıin, áskerde qaýipsizdikti kúsheıtý sharalary týraly suraq qoıdy.
– Qaýipsizdikti jaqsartý jańaǵy siz aıtqan bir jaǵdaıǵa ǵana baılanysty emes, árdaıym jetildirilip otyratyn másele. Qazirgi tańda bizde psıhologtardyń jumysy jetildirildi. Sonymen qatar kameralar qoıý, táýliktik kezekshilerdiń jumysy da kúsheıtildi. Odan bólek, profılaktıkalyq jumys retinde ár kazarmada áskerı polıtsııa ókilderi bar, – dedi Shaıh-Hasan Jazyqbaev.
Onyń sózinshe, jan-jaqty reforma júrgizilip jatyr. Shtattyq qurylymda ózgerister bolyp jatyr. Sonymen birge, áskerı tártipti retteý boıynsha kóptegen baǵytta reformalar júzege asyrylyp keledi.
Aıta keteıik, buǵan deıin Ulttyq ulannyń burynǵy áskerı qyzmetshisi Erbaıan Muhtar ómirden ótkenin jazǵanbyz.
