Erbaıan Muhtardyń komaǵa túsýi janama aýrýlardyń saldary – Ulttyq ulan

ASTANA. KAZINFORM – Ulttyq ulan bólimshesinde merzimdi áskerı qyzmet atqarǵan Erbaıan Muhtardyń komaǵa túsýine janama aýrýlar sebep bolǵan. Bul týraly búgin AMANAT partııasynda ótken is-sharada Ulttyq ulan bas qolbasshysynyń orynbasary, general-maıor Qaırat Úmbetov aıtty.

«Erbaıan Muhtar Ulttyq ulan qatarynda áskerı qyzmetin atqarý kezinde túngi saǵat 2-de uıqysynan turyp, dárethanaǵa barǵanda jyǵylyp, jaraqat alǵan. Qazirgi jaǵdaıy sol jaraqattan emes. Sarbaz emdelý kezinde juqpaly aýrý juqtyryp alǵan. Bizdiń qolymyzdan, áskerı bólim basshylyǵynan dárigerlik kómek kórsetilip jiberilgen. Ókinishke oraı, emdelý kezinde ol ókpeniń qabynýy, irińdi gaımorıt janama aýrýyna ushyraǵan. Osyǵan baılanysty dárigerlerdiń keńesýi arqyly májbúrli túrde jasalǵan ota barysynda osyndaı jaǵdaıǵa dýshar bolyp otyr», - dedi Qaırat Úmbetov.

Aıta keteıik, buǵan deıin áskerde júrip, bas jaraqatyn alǵan qatardaǵy jaýynger Erbaıan Muhtar 6 aıdan beri komada jatqany týraly jazǵan edik. 

Taıaýda Qorǵanys mınıstrligi Otan aldyndaǵy boryshyn óteı júrip, densaýlyǵyna nuqsan kelgen Erbaıan Muhtarǵa vedomstvonyń emdeý mekemelerinde medıtsınalyq kómek kórsetýge daıyn ekenin málimdedi.