Erbaıan Muhtardyń densaýlyq jaǵdaıy shetelge aparýǵa jaramaıdy – sarbazdyń ákesi

ASTANA. KAZINFORM – Birneshe aı komada jatyp, esin jıǵan sarbaz Erbaıan Muhtardyń qazirgi densaýlyq jaǵdaıy belgili boldy.

«Aldymen halyqtyń suraǵyna jaýap bergim keledi, Erbaıannyń emine qarjy jınaldy, nege shetelge aparyp emdetpeı jatyrsyzdar dep jatyr. Balanyń shetelge shyǵatyn qujaty daıyn bolmaı jatyr, Erbaıannyń qazirgi jaǵdaıynda tólqujat bir aptanyń ishinde daıyn bolmaı tur. Tólqujat 15 kúnniń ishinde daıyn bolady dedi, sony kútip otyrmyz. Bizdiń qujatymyz daıyn. Taǵy bir aıtarym, qazir Erbaıannyń densaýlyq jaǵdaıy shetelge aparýǵa jaramaıdy. Tańerteń Densaýlyq saqtaý mınıstri Aqmaral Álnazarovanyń qabyldaýynda boldym. Mınıstrden balamdy shetelge aparyp emdetýdiń jolyn suradyq, ol kisi máseleni 10-15 kúnniń ishinde sheshýge tyrysatyndyǵyn aıtty», - dedi Erbaıan Muhtardyń ákesi Hamıt Aımaǵambetov elordada ótken brıfıng barysynda. 

Ákesiniń aıtýynsha, qazir Erbaıan úı jaǵdaıynda em alyp jatyr, dárigerlerdiń baqylaýynda. 

«Balam mınıstr Aqmaral Álnazarovanyń jeke qadaǵalaýynda, dárigerlerdi jiberip tekserip jatyr», - deıdi ol. 

Eske sala keteıik, áskerde júrip, múgedek bolyp qalǵan sarbazdy Ulttyq ulannyń qolbasshylyǵy shet elde emdetpekshi. 

Sondaı-aq, Ulttyq ulan bólimshesinde merzimdi áskerı qyzmet atqarǵan Erbaıan Muhtardyń komaǵa túsýine janama aýrýlar sebep bolǵany aıtyldy.