Erbaıan Muhtardyń aýyr jaraqatyna baılanysty tergeý aıaqtalǵan joq

ASTANA. KAZINFORM – 5571 áskerı bóliminiń merzimdi qyzmetshisi Erbaıan Muhtardyń jaraqat alýyna qatysty sotqa deıingi tergeý júrip jatyr. Bul týraly Bas áskerı prokýrordyń birinshi orynbasary Maqsat Qazıev málim etti.

Onyń aıtýynsha, atalǵan fakt boıynsha Qylmystyq kodekstiń 440-baby 4-bóliginiń 3-tarmaǵy negizinde ońtústik óńirlik áskerı-tergeý basqarmasy tıisti tergeý amaldaryn júrgizip jatyr.

– Qazir qajetti saraptamalar taǵaıyndalyp, tergep-tekserý jalǵasyp jatyr. Qylmystyq-protsestik kodekstiń 201-babyna sáıkes, sotqa deıingi tergep-tekserýdiń ózge málimetteri jarııa etilýge jatpaıdy, – dep jaýap berdi ol Kazinform agenttiginiń saýalyna.

Eske salsaq, Densaýlyq saqtaý mınıstriniń orynbasary Tımýr Muratov jaraqat alǵan sarbazdyń jaǵdaıyna qatysty túsinikteme bergen edi.

– Ókinishke qaraı, naýqasymyz óte aýyr jaraqat alǵan. Mamandardyń baǵalaýynsha, onyń ońalyp ketý áleýeti sonsha úlken emes. Ol kórsetkishti únemi qaıta-qaıta baǵalap otyrý kerek. Jýyqta ǵana Túrkııadaǵy klınıkadan keldi. Ókinishke qaraı, ol jaqta qandaı ońaltý qyzmetin alǵanyn aıta almaımyn. Úıine jetkizdik. Kez kelgen memleket óz azamattaryn shetelden asa jaıly sanıtarlyq ushaqpen aldyra almaıtynyn túsiný kerek. Mańaıdaǵy kórshi elderdiń ishinde ondaı qyzmet usyna alatyn elder az, – dedi ol.

Sonymen qatar Densaýlyq saqtaý mınıstrligi Muhtar Erbaıannyń Túrkııaǵa emdelýge jiberilgeni týraly habarlaǵan edi.