Erasyl Áýbákirovtiń isi boıynsha úkim 12 qazanda shyǵady
ASTANA. QazAqparat - Astanada Medıtsınalyq ýnıversıtettiń stýdenti Erasyl Áýbákirovtiń aıaýsyz óltirilýine qatysty sot protsesi aıaqtalýda, dep habarlaıdy QazAqparat.
Qylmystyq isti Astana qalasy qylmystyq ister boıynsha aýdanaralyq mamandandyrylǵan soty qaraýda. Sot protsesi alqabıler sotynyń qatysýymen ótip jatyr.
«Alqabıler soty ózderiniń sheshimderin 12 qazanda jarııalaıdy», - delingen sot habarlamasynda.
Sot aldynda qylmys jasady degen kúdik taǵylyp otyrǵan Nurbek Ájimbaı, Vıtalıı Sherstenev pen Andreı Tıhonenko jaýap beretin bolady.
Medıtsına ýnıversıtetiniń stýdenti Erasyl Áýbákirov 3 aqpanda iz-túzsiz joǵalǵan. 10 aqpanda Astana qalasy ІІD qyzmetkerleri jedel-izdestirý sharalary barysynda E.Áýbákirovtiń máıitin tapqan bolatyn. Adam óltirdi degen kúdikpen tórt adam - Aıan Meıirbaev, Andreı Tıhonenko, Vıtalıı Sherstenev jáne Nurbek Ájimbaı ustaldy.
A.Meıirbaev qylmystyq iste eń basty kúdiktilerdiń biri bolǵan. Biraq keıin oǵan qatysty qylmystyq qýdalaý toqtatyldy, 7 mamyrda Astana prokýrorynyń kelisimimen Aıan Meıirbaev bosatyldy.
