Erasyl Áýbákirovtiń isi boıynsha sot protsesi bastaldy
ASTANA. QazAqparat - Medıtsına ýnıversıtetiniń stýdenti Erasyl Áýbakirovtiń ólimine qatysty qylmystyq is boıynsha sot protsesi bastaldy. Aıta keteıik, sot otyrysy BAQ úshin jabyq ótýde.
Otyrys, búgin saǵat 10:00-de bastaldy. Degenmen onyń ózinde olyqylyq oryn aldy. Sotqa Erasyldyń ákesi - Ómirbek Áýbákirovti sot kúzeti protseske kirgizbedi. Oǵan sot zalyna jarty saǵattan soń kirýge múmkin boldy.
«Qandaı sebeptermen meni zalǵa kirgizbeı jatqany belgisiz. Maǵan kúte turýdy surady», - dedi tilshilerge bergen suhbatynda Ó.Áýbákirov.
Aıta ketý kerek, sot protsesin baqylaýǵa respýblıkalyq BAQ ókilderi kóp jınaldy. Olar protseske qatysýshylardyń pikirin bilý úshin sot zalynyń syrtynda kútýde. Syrtta Erasyl Áýbákirovtiń dosy Qaırat esimdi jigit te boldy. Degenmen ol BAQ ókilderine suhbat berýden bas tartty.
«QazAqparat» tilshisimen bolǵan áńgimede ol Erasylmen nebári 2 jyl tanys bolǵanyn jáne sotta kýáger retinde qatysatyndyǵyn aıtty. Onyń sózi boıynsha, qaza tapqan 23 jastaǵy E.Áýbákirovtiń sotta kýáger retinde qatysyp jatqan dostary kóp kelgen.
Eske sala keteıik, sot aldyna qylmys jasady degen kúdikpen tartylyp otyrǵan Nurbek Ájimbaı, Vıtalıı Sherstenev pen Andreı Tıhonenko shyǵady. Іsti alqa bılerdiń qatysýymen sýdıa Aıjan Shaıahmetova qaraıdy.
Medıtsına ýnıversıtetiniń stýdenti Erasyl Áýbákirov 3 aqpanda iz-túzsiz joǵalǵan. 10 aqpanda Astana qalasy ІІD-niń qyzmetkerleri jedel-izdestirý sharalary barysynda budan buryn habar-osharsyz joǵalyp ketken E.Áýbákirovtiń máıitin tapqan bolatyn. Adam óltirdi degen kúdikpen tórt adam - Aıan Meıirbaev, Andreı Tıhonenko, Vıtalıı Sherstenev jáne Nurbek Ájimbaı ustaldy.
A.Meıirbaev qylmystyq iste eń basty kúdiktilerdiń biri bolǵan. Biraq keıin Aıan Meıirbaevqa qatysty qylmystyq qýdalaý toqtatyldy, 7 mamyrda Astana prokýrorynyń kelisimimen Aıan Meıirbaev bosatyldy.
