Erasmus+ granttary kóbeıtilmek — Qazaqstan stýdentteri neni bilýi kerek
ASTANA. KAZINFORM — Eýropa parlamentiniń Strasbýrgte ótken jalpy otyrysynda 2028-2034 jyldarǵa arnalǵan Erasmus+ baǵdarlamasy boıynsha aıtylǵan usynystardy qoldaýǵa ıe boldy, dep habarlaıdy Kazinform agenttiginiń menshikti tilshisi.
Baǵdarlama aıasynda Qazaqstan stýdentteri úshin de oqý, taǵylymdamadan ótý jáne akademııalyq almasý boıynsha jańa múmkindikter ashylmaq. Granttardy kóbeıtýdi qoldap Eýropa parlamentiniń 454 múshesi daýys berdi, 34-i qarsy boldy, al 93-i qalys qaldy.
Eýroparlament prezıdenti Roberta Metsola atap ótkendeı, bul sheshim Eýropadaǵy óskeleń urpaq úshin múmkindikter esigin ashady.
— Men búgin Eýropa parlamenti Erasmus+ baǵdarlamasyn nyǵaıtý, ony qoljetimdi etý jáne qarjylandyrýdy arttyrý úshin daýys bergenin maqtanysh etemin. Osynyń arqasynda jas eýropalyqtardyń kópshiligi óz kókjıekterin keńeıtip, jańa joldar ashyp, mansaptarynda tabysqa jetý úshin qajetti daǵdylar men tájirıbege ıe bola alady. Eýropa degenimiz osy ǵoı, — dep jazdy Metsola áleýmettik jelidegi paraqshasynda.
Parlamenttiń mandatyna sáıkes, baǵdarlama bıýdjetin Eýropalyq Komıssııa usynǵan 40,8 mıllıard eýronyń ornyna 47,39 mıllıard eýroǵa deıin arttyrý usynylady.
Eýroparlament depýtattary sonymen qatar baǵdarlamaǵa qatysýshylardy qabyldaıtyn qalalardaǵy ómir súrý qunynyń, turǵyn úıdiń jáne ınflıatsııanyń aıyrmashylyqtaryn eskeretin ádil granttardy, sondaı-aq múmkindikteri shekteýli tulǵalardy qamtýdy (keıbir salalarda keminde 20%) talap etip otyr.
Baǵdarlamaǵa bólingen qarajat qaı baǵyttarda jumsalatyny naqty belgilengen. Bilim berý men oqytýǵa shamamen 74,6%, jastar men volonterlarǵa 15% jáne sportqa 4,1%. Sonymen qatar Eýropalyq yntymaqtastyq korpýsyn jumyldyrý, kásiptik bilim berý men áýesqoı sportqa qatysýdy keńeıtý, úmitker elder úshin qatysýdy jeńildetý jáne Ulybrıtanııa men Shveıtsarııamen baılanysty nyǵaıtý josparlanyp otyr.
Aıta keteıik, Qazaqstan baǵdarlamanyń Ulttyq keńsesi arqyly Erasmus+ baǵdarlamasyna belsendi qatysyp keledi. Otandyq ýnıversıtetter Halyqaralyq kredıttik mobıldilik (ICM), Capacity Building in Higher Education (CBHE), Jean Monnet jáne Erasmus Mundus jobalaryn júzege asyryp keledi.
EO-nyń Qazaqstandaǵy ókildiginiń málimetteri boıynsha, myńdaǵan qazaqstandyq stýdentter men oqytýshylar eýropalyq ýnıversıtetterde, al eýropalyq stýdentter Qazaqstanda taǵylymdamadan ótti. 2026 jyly qazaqstandyq ýnıversıtetter CBHE jáne Jean Monnet jobalarynyń birneshe tańdalǵan jobalardy iske asyryp otyr.
Baǵdarlamanyń bıýdjetin ulǵaıtý jáne ony qoljetimdi etý qazaqstandyq jastar men ýnıversıtetter úshin Erasmus+ halyqaralyq ólshemi aıasynda múmkindikterdi keńeıtýge múmkindik beredi.
Eske sala keteıik, Qazaqstan Erasmus+ baǵdarlamasy arqyly Eýropalyq Odaqpen yntymaqtastyǵyn joǵary baǵalaıdy. Bul baǵdarlama stýdentter, ǵalymdar jáne ýnıversıtetter úshin aıtarlyqtaı múmkindikter týǵyzdy.
