Eraly Toǵjanov: Úndi shtamyna genomdyq zertteý tolyq aıaqtalǵan joq
NUR-SULTAN. QazAqparat – Elordada anyqtalǵan koronavırýstyń «delta» shtamyna genomdyq zertteý tolyq aıaqtalǵan joq. Bul týraly QR Premer-Mınıstriniń orynbasary Eraly Toǵjanov aıtty, dep habarlaıdy QazAqparat tilshisi.
«Búgingi kúni Qazaqstandaǵy epıdemıologııalyq jaǵdaı turaqty. Sońǵa aıda koronavırýs ınfektsııasymen aýrý deńgeıi 1,7 esege tómendedi. Statsıonarlyq emdelýdegi naýqastar sany 2,1 esege, al ambýlatorlyq emdelýdegi naýqastardyń sany 1,7 esege azaıdy. Infektsııalyq tósek-oryndardyń qory jetkilikti. Olardyń búginde 25 paıyzy, al reanımatsııalyq tósek-oryndardyń 21 paıyzy ǵana qoldanysta. Buǵan halyqtyń vaktsınatsııalaý is-sharalary men epıdemııaǵa qarsy qabyldanǵan naqty sheshimderdiń bári yqpal etti dep aıtýǵa tolyqtaı negiz bar», - dedi Úkimet basshysynyń orynbasary Ortalyq kommýnıkatsııalar qyzmetindegi brıfıngte.
Degenmen, onyń aıtýynsha, búginde álemde aýrý sanynyń kezekti ret artýy baıqalýda. Onyń ishinde aýrýdyń jańa shtammdary da kóptep taralýda.
«Nur-Sultan qalasynda COVID-19-ben aýrý deńgeıiniń ósýine baılanysty vırýstyń mýtatsııaǵa ushyraý yqtımaldyǵyna qatysty skrınıng júrgizilgen. Aldyn ala nátıjeleri vırýs mýtatsııasynyń anyqtalǵanyn jáne ol «delta» shtamyna, ıaǵnı Úndi shtamyna tán ekendigin kórsetti.
Densaýlyq saqtaý mınıstrliginiń jýyrda jasaǵan málimdemesinde aıtylǵandaı, túpkilikti qorytyndy tolyq genomdyq zertteý aıaqtalǵannan keıin belgili bolady. Bul shtamm kórshi elderde de anyqtalǵan. DDSU málimetterine sáıkes, «delta» shtamy búginde álemniń 74 elinde anyqtalyp otyr», - dedi Eraly Toǵjanov.
Aıta keteıik, 22 maýsymda elordada koronavırýstyń úndi shtammy anyqtaldy. Koronavırýstyń «delta» shtammy joǵary juqtyrǵyshqa ıe jáne shtamm anyqtalǵan naýqastardyń 60 paıyzynda 7 kúnge deıingi barynsha qysqa ınkýbatsııalyq kezeńimen erekshelenedi.