Eraly Toǵjanov UBT-dan eń joǵary bal alǵan túlekterdi qabyldady
ASTANA. QazAqparat - Eraly Toǵjanov Mańǵystaý oblysy boıynsha UBT-dan eń joǵary bal alǵan túlekterdi qabyldady. Kezdesý barysynda óńir basshysy túlekterdi quttyqtap, jastar úshin eń mańyzdysy - bilim alý ekendigin atap aıtty, dep habarlaıdy oblystyq ákimdiktiń baspasóz qyzmeti.
Qazaqstan Respýblıkasynyń Prezıdenti Nursultan Ábishuly Nazarbaev «Bolashaqqa baǵdar - rýhanı jańǵyrý» maqalasynda: «Adamı áleýetti damytýdyń uzaq merzimdi saıasatynyń arqasynda biz qazirgi talantty jastardyń jańa býyn urpaǵyn qalyptastyrdyq» degen bolatyn.
Oblys ákimi óz sózinde oblys boıynsha eń joǵary 136 ball jınaǵan Mańǵystaý aýdany Shetpe gımnazııasynyń túlegi Ersultan Rahmetulyn erekshe atap ótip, túlekterge jyly lebizin bildirdi.
«Ulttyq tabysqa, memleketti órkenıetke jetkizetin bilimdi eldiń bolashaǵy - jastar. Sizderdiń alar asýlaryńyz, shyǵar bıikterińiz áli alda! Úlken ómirge basqan qadamdaryńyz qutty bolsyn! Tańdaǵan mamandyqtaryńyz boıynsha joǵary oqý oryndaryna túsýlerińizge tilektespin. Sizderdi osyndaı dárejege jetkizgen ata-analaryńyzǵa, ustazdaryńyzǵa úlken rahmetimdi aıtamyn. Biz Sizdermen maqtanamyz! Alǵan bilimderińiz ben bilikterińizdi, kúsh jigerlerińizdi Otanymyzdyń, oblysymyzdyń órkendep, damýyna jumsaıdy dep senemin» - dep, túlekter men olardyń ata-anasyna jáne muǵalimderge estelik syılyqty tartý etti.
Óz kezeginde, túlekter oblys basshyna rızashylyǵyn bildirip, óz jetistikteri, aldaǵy josparlary týraly aıtyp berdi.
Erjan Janjigitov - Mańǵystaý aýdany Shetpe gımnazııasynyń túlegi, «Altyn belgi» ıegeri. Synyp jetekshisi - Baınazarova Qama Asylbekqyzy, matematıka pániniń muǵalimi.
Ersultan Rahmetuly - Jańaózen lıtseıiniń túlegi, tarıhtan qalalyq olımpıadalardyń júldegeri. Synyp jetekshisi - Menkeeva Shynar Jandyrbaıqyzy, geografııa pániniń muǵalimi.
Bıyl Mańǵystaý oblysy boıynsha UBT-ǵa 4167 túlektiń 4123-i qatysty, 844 bala 100 baldan joǵary upaı jınady. Oblys boıynsha úzdik nátıje kórsetken 10 mektep: Jańaózen lıtseıi, Shetpe gımnazııasy, Jańaózen gımnazııasy, Munaıly aýdany Qyzyltóbe lıtseıi, Jańaózen qalasynyń №19 mektebi, Beıneý gımnazııasy, Jańaózen qalasynyń №8 mektebi, Aqtaý qalasynynyń № 11 mamandandyrylǵan fızıka-matematıka mektebi, Jańaózen qalasynyń №20 orta mektebi, Jańaózen qalasynyń № 14 orta mektebi.
